Inatsisartunut qinersinerup inernera SMS-ikkut takugiuk

KNR-ip ukioq’manna aatsaavissuaq neqeroorutigisinnaassavaa, Inatsisartunut qinersinerup nuna tamakkerlugu inernera oqarasuaatikkut angallattakkakkut sms-erutigineqarsinnaanera.

Tamanna Radiokkut tusarnaarnissaminnut TV-kkulluunniit isiginnaarnissaminnut periarfissaqanngitsunut, imaluunniimmi innajaarusuttunut, tamanna iluaqutaasaqaaq.

SMS-erniaraanni ima allattoqassaaq ”info tilmeld” taavalu uunga normumut nassiullugu 1950, tassa 1 – 9 – 5 – 0. Qinersinerup inernera oqarasuaatikkut angallattakkakkut ingerlaannangajak taava takuneqarsinnaanngussaaq.

Inatsisartunut qinersinermi KNR nammineq aamma naliliigasuartitsissaaq. Illoqarfinni tallimani ilinniagaqartut qinersiviit silataaniinniarput, qinersisartullu qinersereerlutik anigaangata aperisassavaat, kina kikkulluunniit qinersimaneraat.

Kisitsisit ingerlaavartumik naatsorsorneqartassapput, ulloqeqqaanerani unnukkullu Radioaviisikkut, Qanoruukkut aamma KNR-ip nittartagaatigut takuneqarsinnaallutillu tusarnaarneqarsinnaassallutik.

Aasianni, Nuummi, Qaqortumilu GU-mi atuartut, aamma Sisimiuni HTX-ertut aamma Ilulissani STI-mi atuartut taama suliaqassapput

Ilinniartut misissuisussat tujuuluaqqanik KNR-imik ilisarnaatilinnik atussapput, taamaalillutik ilisarineqarsinnaassallutik.