Inatsisartunut qinersineq pissangallutik malinnaaffigaat

Kalaallit Danmarkimiittut inatsisartunut qinersineq aamma pissanngatigeqaat. Københavnimi ilinniartut akornanni qinersineq internetikkut qanimut malinnaavigaat.
Allattoq Mads Lynge
juunip 02-at 2009 12:28

Qinersinermi pissanganaqaaq, Nuka Qupanuk Egede, Kalaallit Danmarkimi Ilinniagaqartut Kattuffianni siulittaasup tullia oqarpoq:

- Qinersineq una assut pissanganartippara, ilinniarnerpummi naammassigutsigu Kalaallit Nunaannut uteqqittussaavugut. Allannguinissarlu pillugu sunniuteqaqataarusulluta qinerseqataavugut, Nuka Qupanuk Egede Radioaviisimut oqarpoq.

Ilinniartut kisimik malinnaanngillat. Vivi Nielsen Danmarkimi ukiorpassuarni najugaqarnikuuvoq qinersinerlu internetikkut malinnaavigissallugu pilersaarusiorpoq. Ukioq manna qineqqusaartut qineqqusaarutaat ersarinnerusutut Vivi Nielsenip nalilerpai, pissanganaqutaasimavorlu:

- Ukioq manna qineqqusaartutn qineqqusaarutaat ersarinnerupput, taamaammallu malinnaaviginiarneruakka. Ulluinnarnimi aqutsisut taarserneqarnissaat immaqa kissaatiginerullugit malinnaanerunissaq pingaartippara, Vivi Nielsen oqarpoq.

- Danmarkimi najugaqaratta akunnernik sisamanik siulliuvugut, taamaammat SMS-ikkut oqarasuaatikkut internetikkulluunniit malinnaaniartussaassaagut, Vivi Nielsen naggasiilluni oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk