Inatsisartunngortut ukiui nikingaanngillat
Marlunngormat Inatsisartunut qinersinermi arnat amerlaqisut inatsisartunut isernerat aamma inuppassuit maluginiarpaat.
Allattoq Elisa Isaksen
Inatsisartulli nutaat imatorsuaq allannguuteqanngillat, arnaaneq angutaanerluunniit imaluunnit qassinik ukioqarneq eqqarsaatigalugit.
2005-imi inatsisartunut qinersisoqarmat angutit 18-it arnallu 13-it qinigaapput, marlunngormallu angutit 19-it arnallu 12-it Inatsisartunut iserlutik. Tassalu 2005-iminngarnit arnamik ataatsimik ikinnerullutik.
2005-imi ukiut agguaqatigiissinneri 46,6-iupput - Inatsisartuni nutaani ukiut agguaqatigiissinneri 45,1-iulluni, taamaalillunilu Inatsisartut qinersinermut kingullermut naleqqiullugu agguaqatigiissillugu ukiup aappaa avillugu inuusunnerullutik.