Inatsisartunit tamat suleqatigiinnissaat ilimananngilaq

Naalakkersuisut siulittaasuata Kuupik Kleistip ammaanermi oqalugiarnermini, partiit suleqatigiinnissamut piumassuseqarnissaasa pingaassusia ilaatigut eqqaavaa. Illuatungiliuttut aperigaanni, Inatsisartut ataatsimoornissaat ilimanarpallaanngilaq.

- Naalakkersuisut siulittaasuata oqariartuutigivaa, aningaasanut inatsit sapinngisamik katersuuffigineqassasoq. Taamaanniassappalli allanngortitigassarpassuaqassapput, Siumup siulittaasua Aleqa Hammond Kuupik Kleistip aammaanermi oqalugiaataa pillugu oqarpoq.

Tassa isumaqarpoq, oqalugiaat suliassanut eqqortunut samminngitsoq.

- Siullertut eqqumiiginarpoq, Nunatsinni suliffissaaleqisut siornamut naleqqiullugit marloriaatinngorsimanerat oqaatsimik ataatsimilluunnit taanngimmagu. Aappaattut inuussutissarsiut pingaarnerpaaq, aalisarneq, oqalugiaaterujuassuarmi kingulliit ilaattut ilanngukkaa maluginiagassaavoq pingaartoq.

Taavalu aamma Siumup siulittaasuata Naalakkersuisut siulittaasuata siuttuussusermik takutitsinissaa ujartorpaa.

- Naalakkersuisut siulittaasuata pingaartitai aningaasanut inatsisissatut siunnersuummi takuneqarsinnaanngillat.

Atassutip gruppiani siulittaasup, Siverth K. Heilmannip, partiini Naalakkersuisoqatigiinnik suleqateqassanersoq maannangaaq oqaatigisinanngilaa:

- Massakkut oqaatigereerneq ajornarpoq, siunnersuutaat tamaasa isumaqataaffigissallugit imaluunniit akerliuffigissallugit. Qanillattorsinnaanerli pisariaqarpoq. Naalakkersuisut aningaasanut inatsisissatut siunnersuutaat uagut isummatsinnut arlalitsigut ungasippoq. Kisianni isummavut erseqqissut aammaarluta piumassuseqarluta ersersinniartarumaarpagut, Siverth K. Heilmann oqarpoq.

Aammali Siumumiit suleqatigiinnissaq mattulluinnarneqanngilaq:

- Inuiaqatigiit toqqagaraatigut. Inuiaqatigiit inuunerisa pitsaanerulernissaanut oqinnerulernissaanullu pisussaaffeqarluta maani sulivugut, Aleqa Hammond oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat