Inatsisartuni ullumi oqaluuserisassat
Katersugaasiveqarneq pillugu inatsisissaq Kultureqarnermut Naalakkersuisup Nivi Olsenip ataatsimiinneq aallarnerlugu saqqummiutissavaa, inatsimmullu tassunga atatillugu pingajussaaneerinninnerussalluni.
Allagaateqarfeqarneq pillugu inatsisissaq Nivi Olsenip tassunga uiggiullugu aamma saqqummiutissavaa, taannalu aamma pingajussaaneerneqartussaalluni.
Kulturikkut ingerlatsineq sunngiffimmilu sammisassaqartitsineq pillugit peqqussummut allannguutissatut siunnersuut Inuit Ataqatigiit sinnerlugit Inatsisartuni ilaasortap Peter Olsenip siunnersuutaa kingorna taava oqaluuserineqassaaq.
Taamaalereerpat Aalisarnerup nutarterniarneqarnera qanoq naammassiniarneqarnersoq pillugu Ane Hansenimit Inuit Ataqatigiinneersumit apeqquteqaat Inatsisartut oqallisigissavaat.
Taava innuttaasut kigutinut nakorsaqarfiunngitsuni najugaqartut pisariaqartitsilernerni ukioq kaajallallugu tassanngaannartumik suliaritittariaqalersut isumagineqarfissaminnut qaninnermut angalanissaminnut akiliutissaannik ikiorserneqarsinnaaqqullugit Juliane Henningsenip Inuit Ataqatigiinneersup siunnersuutaa Inatsisartut siullermiissaavaat.
Naalakkersuinikkut arlaannaannulluunniit attuumassuteqanngitsunik siunnersuisoqatigiinnik Naalakkersuisut pilersitsinissaannik siunnersuut oqaluuserisassani tulliutissaaq, oqaluuserineqartussatullu siunniunneqartut naggaserlugit ILO-mi isumaqatigiissutinik Namminersorlutik oqartussat akuersinerat pillugu inatsit oqaluuserineqassalluni.
Inatsisartut ataatsimiinnissaat pissutigalugu ualeru nalunaaqutaq ataatsimit tallimat tungaannut Radioaviiseqartassanngilaq.
