Inatsisartuni ullormut pisussat
Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsit siullertut pingajussaaneerneqassaaq.
Akileraaruserinermullu inatsimmut allannguutissatut siunnersuut kingorna aamma pingajussaaneerneqassaaq. Inuusuttut 16-init 29-nut ukiullit ilanngullugit suliffissarsiortutut allatsissimasut, ilinniagaqalernissaat suliffittaarnissaallu siunertaralugu Naalakkersuitut immikkut ittumik pilersaarusiornissaat pillugu siunnersuut taava oqaluuserineqassaaq.
Taassuma saniatigut aappaagumut aningaasanut inatsisissatut siunnersuut Aningaasaqarnermut naalakkersuisup taava saqqummiutissavaa, ullumikkut aappassaaneerneqassalluni.
Qallunaat oqaasiinut taarsiullugit tuluit oqaasiisa pingaarnerit aappaattut Nunatsinni meeqqat atuarfianni atuartitsissutigineqartalernissaat pillugu apeqquteqaat aallaavigalugu Inatsisartut oqallinnissaat taava aamma siunnersuutigineqarpoq.
Inatsisartut ataatsimiinnerat KNR2-kkut nittartakkatigullu KNR.gl-ikkut nalunaaqutaq qulinit malinnaavigineqarsinnaavoq.