Inatsisartuni ullormut pisussat
Oqaluuserisassat ilaat inatsisinut atuutilereersut oqaasertaasa allanngortinneqarnissaannut tunnganerupput, tassa kalaallisut qallunaatullu assigiissaarneqarnissaannut tunngassuteqarlutik.
Naatsorsuuserinermut inatsimmut allannguutissatut siunnersuut, akileraaruserinermullu inatsimmut allannguutissatut siunnersuut taakkununnga ilaapput.
Aningaasanoorutit ilaat pillugit Kalaallit Nunaannut inatsimmut aalajangiiffigisassatut siunnersuut aamma aappassaaneerneqassaaq. Aningaasanoortartut aningaasat kaaviiaartitaasa amerlisimanerat aningaasanoorniutinik neqerooruteqartartup Danske Spilip maluginiarsimavaa, tassa inuit assersuutigalugu Oddsertartut kiliortortakkanillu pisisartut amerlisimammata.
Aningaasat taakkunaneersut ilaat kulturikkut timersornermilu suliniutinut Danske Spilimit tunniunneqartarput, aningaasallu Nunatsinni aningaasanoornermut atorneqartartut amerlisimanerat pissutaalluni Danske Spilip Nunatsinnut utertittagai 40 millionit koruuninit 44 millioninut Danske spilimit qaffanniarneqarput, inatsisartullu aningaasat taakku tunniunniarneqarnerat qujamasuutigaat.
Taamaalereerpat Jess Svanep, Siumumeersup, apeqquteqaat aallaavigalugu oqallinnissamik siunnersuutaa ataatsimiinneq naggaserlugu oqaluuserineqassaaq.
Ineqarnikkut aaqqissuusseqqinnerup innuttaasunut amerlanerpaanut ataavarnerusumik iluaqutissanngortinnissaa qanoq qulakkeerneqarnissaanersoq, aammalu inuiaqatigiit akornanni akissarsiakinnerit akunnattumillu isertitaqartartut akilersinnaasaannik ineqarnikkut qanoq aaqqissuussisinnaanersugut Jess Svanep apeqquteqaatigaa.