Inatsisartuni ullormut pisussat
Inatsisissatut siunnersuummi immikkuualuttut ilaat Inuit Ataqatigiit isumaqataaffigaat, inatsisissatulli siunnersuut ataatsimut isigalugu atsioqataaffiginiarnagu. Assersuutigalugu siusinaartumik soraarnerussutisiaqartarnermik aaqqissuusseqqinniarnermut atatillugu inatsimmik allanngortiteriinnarnertut Inuit Ataqatigiit isumaqarput, aaqqissuusseqqinneruviunngitsutut nalilerlugit.
Kisitsisit aningaasanut inatsisissatut siunnersuummut tunngaviginiarneqartut assigiinngitsut pissarsiarisarsimallugit, Inuit Ataqatigiit siulittaasuata Sara Olsvigip oqaatigaa, Inatsisartut ataatsimiittarfianneersut, Inatsisartullu ataatsimiittarfiata silataaneersut assigiinngitsuusarnerat oqaatigalugu.
AAMMA ATUARUK IA: Kisitsisit ilaat kusassarneqarsimarpasipput
Siusinaartumik soraarnerussutisiaqartartut aaqqissuusseqqiffigineqarnissaat taamaammat taassuma apeqquserpai, kommunit, aaqqissuusseqqinnermik nammaqataasussat aaqqissuusseqqinniarnermi tusarniarneqarsimannginnerat pissutaalluni aaqqissuusseqqinniarneq apeqquserlugu.
Aalajangiiffigisassatut siunnersuutit apeqquteqaallu aallaavigalugu oqallinnerit
Aningaasanut inatsisissap pingajussaaneerneqarnissaata saniatigut, kommunini sulisut meeqqanik inuusuttunillu ajornartorsiuteqartunik tunngasunik oqaloqatigiinnissaat siunertaralugit sulisut pineqartut qanoq assigiinngitsunik amerlatigisunik, kiisalu suliassiissutinik sulinerminnilu qanoq nammataqartiginersut, taamatullu suliassanut nukissanik naammattunik peqartitsinersoq, Naalakkersuisut misissuiffigissagaat, nalunaarusiornermunnilu naliliisoqarnissaa, Inuit Ataqatigiit sinnerlugit Inatsisartuni ilaasortap Aaja Chemnitz Larsenip siunnersuutaa aamma oqaluuserineqassaaq.
Taassuma saniatigut apeqquteqaatit aallaavigalugit oqallittoqarnissaa pillugu siunnersuutit saqqummiunneqartussaapput. Assersuutigalugu nunatsinni tamani utoqqaat illuisa pilersaarusiorfigineqarnissaat siunertaralugu Partii Naleqqap siulittaasua Hans Enoksen, apeqquteqaat aallaavigalugu oqallittoqarnissaanik siunnersuuteqarpoq.
Inissialiortiternermi pisortat tapiissutaasa qanoq agguataarneqarnissaannik ineqarnerlu pillugu aaqqissuusseqqinnissaq qanoq ittoq Naalakkersuisut Inatsisartunilu ilaasortat isumaliutersuuteqarnersut, Inuit Ataqatigiit sinnerlugit Inatsisartuni ilaasortap Ane Hansenip apeqquteqaatigaa, tamannalu pillugu oqallittoqassalluni.
