Inatsisartuni ullormut pisussat
Tamanna pereerpat, meeqqat atuarfiat pillugu inatsisip allanngortinneqarnissaa oqaluuserineqassaaq, meeqqat atuarfiat pillugu angajoqqaat nuna tamakkerlugu isumalioqatigiissitaannik pilersitsinissaq siunertarineqarluni.
Ilinniartitaanermut naalakkersuisoq Nivi Olsen naapertorlugu, atuarfeqarnermi apeqqutit pingaaruteqartut pillugit angajoqqaat isumaannik ataatsimut nalunaaruteqarfissaannik pilersitsinissaq siunnersuummi siunertaavoq.
Tullertullu, Inuit Ataqatigiinneersup Mimi Karlsenip aalajangiiffigasassatut siunnersuutaa oqaluuserineqassaaq. Taanna Nunarput tamakkerlugu kommunit suleqatigalugit angerlarsimaffeqanngitsunut angerlarsimaffiugallartussanik 100-nik sanaartornissaq qulakkeeriarlugu siunnersuummik aningaasaleeriaatsimik imaqartumik kingusinnerpaamik 2017-imi ukiaanerani ataatsimiinnermi Naalakkersuisut saqqummiussinissaat pillugu aalajangiiffigisassatut siunnersuuteqarpoq.
Kingullertut Inuit Ataqatigiinneersup Ane Hansenip aalajangiiffigisassatut siunnersuutaa oqaluuserineqassaaq, taanna utoqqarnut sammititanik siunissami pisortat sanaartortarnissaannut aaqqiissutissamik innersuussisumik Naalakkersuisut kingusinnerpaamik 2017-imi ukiaanerani ataatsimiinnermi nassuiaammik saqqummiussinissaannik peqquneqarnissaannik aalajangiiffigisassatut siunnersuuteqarpoq.
Inatsisartut ataatsimiinnerat pisarnertut nalunaaqutaq qulinut aallartissaaq KNR2-kkullu malinnaavigineqarsinnaalluni.
