Inatsisartuni ullormut pisussat
Immikkoortup siulliup oqaluuserineqarnerani Nunatsinni aningaasanoortartut politikerit nuannersumik eqqarsaatigisariaqassavaat.
Timersortummi unamminerisa inernerinik eqqoriaanermik, lottornermik imaluunniit kiliortortakkanik aningaanoornermik nuannarisallit nunatsinni amerlasuupilusuupput.
Danske Spilip sinneqartoorutaata ilai kulturikkut siunertanut atorneqartarput, Naalagaaffeqatigiinnilu aningaasanoorutigineqartut ilaannik nunatta karsia ukiuni kingullerni ukiumut 40 millionit koruuninik pissarsisarpoq.
Aningaasalli taakku, Nunatsinni ukiumut aningaasanoorutigineqartut amerlassusaannik naliliineq tunngavigalugu 43.250.000 koruuninut amerlineqarnissaat maanna siunnersuutigineqarpoq.
Siunnersuutigineqartoq soorlu Inatsisartuni partiinit amerlanerussuteqartunit isumaqataaffigineqassasoq.
Ullormut oqaluuserisassani immikkoortut aappaattut Nunatsinni sullivinni avatangiisit pillugit inatsisip allanngortinneqarneranik aamma Nunatsinni sulisilluni ajoqusersinnaanermut isumannaarineq pillugu inatsisissatut siunnersuut oqaluuserineqassapput.
Siunnersuut aamma ILO-p aatsitassarsiorfinni isumannaallisaaneq peqqinnissarlu pillugit nunani tamalaani isumaqatigiissutaata atuutsinneqalernissaanut ilaavoq.
Siunnersuummi aamma akuutissat uumaatsut navianartut imaluunniit atortussat naleqqutinngitsumik atorneqartarnerat annikillisinneqassaaq, Inuussutissarsiornermut Suliffeqarnermullu Naalakkersuisoq Vittus Qujaukitsoq siunnersuummut oqaaseqatimini taama allappoq.
