Inatsisartuni ullormut pisussat
Immikkoortoq siulleq aatsitassanut inatsimmut allannguutissatut siunnersuutaavoq, Naalakkersuisullu Randi Vestergaard Evaldsenip Naalakkersuisut sinnerlugit saqqummiutissavaa.
Aatsitassat pillugit ingerlatallu tamatumunnga pingaarutillit pillugit inatsimmi allannguutissatut siunnersuutit, soorlu aalajangiinerup eqqartuussivinnut suliakkiunnissaanut piffissanut killiliussaq, annikitsumillu aatsitassarsiorluni aatsitassanik suliaqartarneq, akuersissummik peqarani aatsitassanik katersisarneq piiaasarnerlu, akileraartarnermullu nalunaarusiortarneq akiliisarnerlu pillugit maleruagassat matumani pineqarput.
Taamaalereerpat Kalaallit Nunaanni pinerluttulerineq pillugu inatsit, Kalaallit Nunaannilu eqqartuussisarneq pillugu inatsisip allanngortinneqarnissaannut siunnersuutit Inatsisartut eqqartussavaat.
Kalaallit Nunaanni pinerluuteqarsimasunut inissiisarfinni pissaanermik atuinerit, palleeqqusinnginneq, sumiiffinneeqqusinnginnerillu pillugit inatsisit assigisaannullu Namminersorlutik Oqartussat tapersersuinissaat siunnersuutigineqarpoq.
Inatsisartullu ullumikkut ataatsimiinnissaat naggaserlugu Namminersorlutik Oqartussat upalungaarsimanermut inatsisip Kalaallit Nunaannut atuuttussanngortinneqarnera pillugu kunngikkormiut peqqussutaannut akuersinissaat pillugu Inatsisartut aalajangiiffigissavaat.
