Inatsisartuni ullormut pisussat
Tassalu kulturikkut ingerlatsineq sunngiffimmilu sammisassaqartitsineq pillugit inatsit, timersorneq timigissarnerlu pillugit inatsit aamma eqqumiitsuliornermik ingerlatsineq pillugu inatsit.
Ilinniartitaanermut, kultureqarnermut, ilisimatusarnermut ilageeqarnermullu naalakkersuisoq, Nivi Olsen, siunnersuuteqartuuvoq.
Aamma inunngortunik toqusunillu nalunaaruteqartarneq, ilisinerit iliveqarfiillu pillugit Inatsisartut inatsissaattut siunnersuutaa pingajussaaneerneqassaaq.
Sumiginnaanerit pillugit nalunaaruteqartarnissanut kommunini ataatsimoorussamik oqarasuaammik aalajangersimasumik sianerfigineqarsinnaasumik pilersitsinissaq pillugu siunnersuut aamma oqaluuserineqassaaq.
Attaviitsoq Naaja Nathanielsen siunnersuuteqartuuvoq.
Demokraatineersup Justus Hansenip Kalaallit Nunaanni politiit nalunaaruteqartoqarneranit qisuariarnissap tungaanut piffissamik atorneqartartumik nalunaarsuisalernissaq siunnersuutigaa.
Siunnersuut Inatsisartut inatsiseqarnermut ataatsimiititaliaanit taperserneqanngilaq, ataatsimiititalialli Naalakkersuisut kaammattorpai tamanna pillugu naalagaaffimmi oqartussanut oqaloqatigiinnernik aallartitseqqullugit.
Kingullertullu apeqquteqaat aallaavigalugu oqallinnerit marluk pissapput - Partii Naleqqameersoq Hans Enoksen siunnersuuteqartuuvoq.
Nunaqavissut atorfinni qaffasinnerusuni qanoq iliornikkut atorfinitsitaasalersinnaanersut oqallisigitikkusuppaa, aappaattullu, ineqarnermut akiliutit qaffakkiartuinnartut, kiisalu ineqarnermut tapiissutit qaffanneqarnissaat, aammalu kiassarnermut akiliutit qaffasippallaarnerat pillugit apeqquteqaat aallaavigalugu oqallinnissamik siunnersuuteqarpoq.
