Inatsisartuni ullormut pisussat
Ullumikkullu ataatsimiinneq aallarnerlugu, Sulisilluni ajoquserneq pillugu Sullissivimmut Nuummiittumut taarsiullugu Nunatta sullissivimmut imminut pigisumut »Arbejdsmarkedets Erhvervssikring«-imut ilanngunneqarnissaannik siunnersuut siullermeerneqassaaq. Siunnersuullu taanna Naalakkersuisunit taperserneqarpoq.
Ullormut oqaluuserisassani immikkoortut aappaat Aasianni kulturikkut illorsualiornissamik suliniuteqarnermut tunngasuuvoq. Inuit Ataqatigiinneersoq Peter Olsen, Namminersorlutik Oqartussat suliniummut 52 millionit koruuninik akeqartussatut missingersuutigineqartumut aningaasalersueqataanissaannik siunnersuuteqarpoq.
Kultureqarnermut naalakkersuisup Nivi Olsenip suliniutaasoq immini isumassarsialatsialaasutut taavaa, aningaasanulli inatsisissamut isumaqatigiinniarnissanut innersuussivoq siunnersuullu maannakkutut isikkoqartillugu tapersersorsinnaannginnerarlugu.
Tulliullugu oqaluuserineqartussaq tassaavoq Siumumeersup Jess Svanep Naalakkersuisut sermimik imermillu avammut nioqquteqalernissamut pilersaarusiaannut nassuiaatip 2004-meersup nutarterneqarnissaanik siunnersuutaa.
2017-imi ukiakkut ataatsimiinnermi nassuiaammik nutaamik saqqummiussisoqarnissaa Jess Svanep kissaatigaa, suliassaqarfimmulli akisussaasup inuussutissarsiornermut niuernermullu naalakkersuisup Vittus Qujaukitsup erseqqissaatigaa suliaq taama ittoq aallartinneqareersimasoq ukiorlu manna naatinnagu saqqummiunneqarumaartoq.
Kingullertullu Martha Lund Olsenip siunnersuutaa oqaluuserineqassaaq. Isumaginninnermi malittarisassanik kommunit aqutsinerannik Namminersorlutik Oqartussat tigusigallarsinnaanerannik siunnersuut siullermeerneqassaaq.
Siunnersuut Meeqqat Illersuisuata Qaasuitsup Kommuniani pissutsit pillugit nalunaarusiaanik, kommunimi isumaginninnermi aqutsinermik sakkortuumik isornartorsiuiffiusumik toqqammaveqarpoq.
Suliniaqatigiiffiit kattuffiillu arlalissuit tusarniaanermi akissuteqarsimapput. Kommunit kattuffiata KANUKOKA-p siunnersuut isornartorsiorpaa isumaqarluni kommunit namminneerlutik aalajangiisinnaassuseqarnerannut unioqqutitsinerussasoq, meeqqallu pillugit suliniaqatigiiffiit arlallit siunnersuutip ilaatigut meeqqat pisinnaatitaaffiinik qulakkeerinninnissamik siunertaqarnera taperserpaat.
