Inatsisartuni ullormut pisussat
Tamanna sioqqullugu - nalunaaqutaq aqqanernut - akunneq apeqqarissaarfiusoq ingerlanneqareersimassaaq, tamatumuuna llaqutariinnermut, Naligiissitaanermut Isumaginninnermullu Naalakkersuisoq Martha Lund Olsen apeqqarissaarfigineqarluni.
Aningaasanut inatsisissaq naammassillugu Inatsisartuni suliarineqassappat, partiinut ilaasortat assigiinngitsut inatsisissatut siunnersuutaat saqqummiunneqassapput.
Assersuutigalugu Inuit Ataqatigiinneersoq Aqqaluaq B. Egede savaatillit nersutaatillillu inuussutissarsiuteqarnerannut nanoqartalernera qanoq annertutigisumik ajornartorsiutaalersimanera, tamatumanilu tamatuma qanoq iliuuseqarfigineqarsinnaanera pillugu Naalakkersuisut misissuisitsissasut Inatsisartut aalajangiiffigisassaattut siunnersuuteqarpoq.
Siumumeersup Nikolaj Jeremiassenip imartami sillimaniarnerup, umiarsuarnik nalunaarsuinerup, inatsiseqarnerup il.il. tamakkiisumik oqartussaaffigineqalersinnaaneri pillugit Naalakkersuisut upernaakkut ataatsimiinnermi 2016-mi nassuiaammik saqqummiussinissamik peqquneqarnissaannik Inatsisartut aalajangiiffigisassaattut siunnersuutigaa.
