Inatsisartuni ullormut pisussat
Kommunini suliffissarsiuussisarfiit Piareersarfiillu kattussuunnerisigut sullissiviit pilersinniarneqarput.
Sullissiviit tassaassapput suliffissaaleqisut siunissami saaffiginnittarfissaat, tamannalu kommunini sisamaasuni illoqarfinni tamani sullissinerup assigiiaartuunissaata qulakkeernissaanik Naalakkersuisut periusissiaannut atatillugu pissaaq.
Siunnersuut Inuussutissarsiornermut ataatsimiititaliami eqqartorneqareerluni ullumikkut aappassaaneerneqassaaq. Ataatsimiititaliap isumaqatigiissup siunnersuut taperserpaa.
Nunat Avannarliit Killiit Siunnersuisoqatigiiffiata kaammattuutaa Inatsisartuni aamma eqqartorneqassaaq. Nunani avannarlerni killerni naalakkersuisunut kaammattuutigineqarpoq Issittumi nunat tamalaat akornanni unammilleqatigiinnerup annertuneruleriatornerani nukittunerusumik inissisimaqqulluta Nunani avannarlerni killerni assartuinermut pilersuinermullu tunngasuni ungasinnerusoq isigalugu ataatsimut anguniagaqarsinnaanermut periarfissat nalilersorlugit misissueqqissaarnermik suliaqaqqullugit.
Nunatta avataani ilinniareerlutik uterneq-ajortut qassiuppat
Nunatta avataani ilinniartut naammasereernermik kingorna ukiut qulit angullugit Nunatsinnut uteqqittannginnerat kiisalu ilinniartut naammassereerlutik Nunatsinnut uteqqikkumasannginnerannut pissutaasut pillugit misissuinissamik aallartitseqqullugit Naalakkersuisut peqquneqarnissaannik Inatsisartut aalajangiiffigisassaattut Demokraatit siunnersuuteqarput.
Misissuinerup kinguneranik uterartitsinissaq pillugu iliuusissamik pilersaarusiortoqassaaq, kalaallit ilinniartut naammassereerlutik Nunatsinnut uteqqittarnissaminnut kajumissuseqalernissaannut kammattuutaasussamik.
Nunatsinni sulisoqarniarnikkut sulisussarsiortarnermi aammalu sulisunik atatitsiinnarnissamut pissutsinik Naalakkersuisut qulaajaanermik suliaqartitsinissaannik Inatsisartut aalajangiiffigisassaattut Atassut siunnersuuteqarpoq.
Qulaajaalluni suliap pingaartumik sammissavai inuiaqatigiittut ingerlatsinermi suliffeqarfiit pingaarutillit, soorlu peqqinnissaqarfik aamma atuarfeqarfiit. Atassutip aamma paaserusuppaa innuttaasut suliffeqarnermut attaveqarniarnermikkut annaasaqarnissamut aarlerinaatillit pillugit suliniutit suut ingerlanneqarnersut.
Qulaajaalluni suliaqarneq naammassineqarsimalluni kingusinnerpaamik Inatsisartut 2016-mi ukiakkut ataatsimiinneranni saqqummiunneqassaaq.
Partii Naleqqameersup Anthon Frederiksenip siunnersuutigaa aatsitassarsiorluni annikitsuinnarmik misissuinissamut aamma piiaanissamut akuersissutit najugaqavissunut tamakkiisumillu akileraartussaatitaasunut aammalu Nunatsinni ukiuni qulini inuit allattorsimaffianni nalunaarsorsimallutik najugaqareersimasunut taamaallaat tunniunneqartalissasut.
