Inatsisartuni ullormut pisussat
Oqaluuserissaq siulleq tassaavoq meeqqat inuusuttullu ilungersunartumik pinerluttuliornermi eqqugaasimasutut imaluunniit isiginnittuusimasutut ilimagineqartut illersorniarlugit video atorlugu apersorneqartarnerinut tunngatillugu siunnersuut.
Meeqqap qaqugukkut video atorlugu apersorneqartarneranut ukiut killissaliussat siornatigut 12-nut killeqarput, ukiullu killiliussat 12-init 15-inut qaffanneqarnissaat maanna siunnersuutigineqarpoq, pisunilu immikkut ittuni ukiut killissaliussat ukiunut 18-inut qaffatsinneqarsinnaasassallutik.
Ullormut oqaluuserisassani immikkoortoq kingulleq tassaavoq inuussutissarsiornermut suliffeqarnermullu naalakkersuisup Vittus Qujaukitsup siunnersuutaa. Taassuma kommunit tamarmik illoqarfinni tamani kommunimiittuni suliffissanut, ilitsersuisarnernut pikkorissaqqinnernullu qitiusumik ingerlatsivinnik pilersitsinissaq siunnersuutigaa.
Siunnersuut Naalakkersuisut suliffissaaleqinermik annikinnerulersitsiniarlutik suliniutaannut ilaavoq, nunatsinni suliffeqarnermi ingerlatsivimmik ataatsimuulersitsinikkut, naammattunik piginnaaneqartumik sunniuteqarluartumillu sullissivimmik tamatumunnga ingerlatsisuusussamik ataatsimuulersitsinikkut.
Siunnersuut piginnaanngorsaanermik imaqarpoq, suliffissaaleqisut pingaartumillu inuusuttut suli suliffeqarnermut anngussimanngitsut pilersaarusiuunneqartalissallutik, qanoq iliornikkut iluatsilluartumik ingerlaqqinnissaannut, piffissallu ingerlanerani suliffeqalernissaannut aqqutissiuunniarlugit.
Inatsisartut ataatsimiinnerat nalunaaqutaq ataatsinut aallartissaaq.
