Inatsisartuni ullormut pisussat
Immikkoortoq oqaluuserineqartussaq siulleq tassaavoq sulisoqarnermut akitsuutinik akiliuteqartarnermut piffissaliussat pillugit siunnersuutip pingajussaaneerneqarnera. Suliffeqarfiit akitsuutinik akiliuteqarnissaannut piffissaliussaq ullunik qulinik sivitsorniarneqarpoq, piffissaq akiliuteqarfissap. Siunnersuut partiinit tamanit tapersersorneqarpasippoq.
Partiinut aningaasatigut tapiissutaasartut pillugit inatsisit aammalu politikerit sulinngiffeqarnermut atatillugu akissarsiaqartinneqarnerinut malittarisassat qinikkat aamma oqaluuserissavaat.
Innuttaasut pisariaqartitsilernerni ukioq kaajallallugu kigutigissaasoqarfiunngitsuni najugaqartut tassanngaannartumik suliaritittariaqartut isumagineqarfissaminnut qaninnermut angalanissaminnut akiliutissaannik ikiorserneqartarnissaannik Juliane Henningsenip siunnersuutaa aappassaaneerneqassaaq. Siunnersuutigineqartorli taperserneqarpallaanngilaq, siullermeerneqarmat amerlanerussurteqartunit itigartitsissutigineqartussatut inassutigineqarluni.
Anders Olsen Siumumeersoq Nunatta inuiattut timersornikkut unammersuartarfissaanik qulisamik "National stadion"-imik pilersitsinissaq siunertaralugu Naalakkersuisut pilersaarummik suliaqaqqullugit peqquneqarnissaanik Inatsisartut aalajangiiffigisassaattut siunnersuuteqarpoq. Pilersitsinissamut pilersaarummi misissorneqassapput unammersuartarfissap ingerlanneqarnerani sanaartornissamilu aningaasatigut pissutsit atuuttussat. Ataatsimiititaliap isumaqatigiissup siunnersuut isumaqatigaa.
Inatsisartullu ullumikkut ataatsimiinnerat naggaserlugu apeqquteqaat aallaavigalugu oqallinnerit assigiinakkersut marluk, Hans Enoksenimit Juliane Henningsenimillu siunnersuutigineqartut, oqallisigineqassapput. Nunatsinni meeqqat suli atualinngitsut ulluunerani paaqqinnittarfinni pitsaanerusunik neqeroorfigineqarsinnaanissaat oqallisigitikkusuppaat.
