Inatsisartuni ullormut pisussat
Nunap ilaani aatsitassarsiorfissanik inerisaaviusussanik aammalu nunap ilaani allani pinngortitaq avatangiisillu illersorniarlugit aatsitassarsiorfigineqarusunngitsunik pilersitsinissaq partiip kissaatigaa. Siunnersuut siullermeerneqarmat partiinit naalakkersuisuutitaqartunit itigartinneqarpoq, Inuit Ataqatigiit taamatut siunnersuuteqarnerat partiip Kujataani uranisiornissamut akerliuneranik aallaaveqarnerarneqarluni.
Ullormut oqaluuserisassani immikkoortut tullii marluk, Inatsisartuni naalakkersuinikkut sulinermut aningaasatigut tapiissuteqartarnermut tunngassuteqarput, tapiissuteqartarnermut malittarisassat nalinginnaasumik sukateriffigineqarnissaat tamatumani siunnersuutigineqarluni.
Inatsisartunut ilaasortat qinigaaffiup ingerlanerani partiinut allanut nuuttarnerannik misilittakkat aallaavigalugit, partiinut tapiissutaasartut partiit ilaasortaatitaasa ukiup affakkuutaartumik nalunaarsorneqarnerat tunngavigalugu aalajangersarneqartalernissaat siunnersuutigineqarpoq. Partiinut tapiissutit siornatigut ukiumut ataasiarlugit aalajangersarneqartarput.
Aammattaaq ilaasortat Inatsisartuni sulinerup saniatigut aningaasatigut soqutigisaqarfimminnik paasissutissiinngikkaangata partiimut tapiissutinik ilanngaassisinnaaneq siunnersuutigineqarpoq. Aamma siunnersuutinik oqaatsinik ataasiinnarnik tunniussisoqartillugu nutserinermut tapiissutisiarineqartartunik ilannaassisinnaaneq pineqarpoq.
Oqaluuserineqartussaq alla tassaavoq umiarsualiviit pillugit Inatsisartut inatsisaata appassaaneerneqarnissaa. Ilaatigut kommunit namminersortullu aaqqissugaannik umiarsualiviutileqatigiiffiit namminersortut pilersinnissaannik ammaassinissaq, kiisalu umiarsualiviit atorneqarnerinut akitsuutinik eqqussinissaq siunnersuummi pineqarput.
Ullormullu oqaluuserisassani kingullertut Inuit Ataqatigiit apeqquteqaat aallaavigalugu oqallinnissamik siunnersuutaat marluk Inatsisartuni oqaluuserineqassapput.
Nunaqarfinni aqutsisut, taakkulu akisussaaffeqarfii, kiisalu siorna oqallisaaqisoq, kommunit akornanni aningaasaqarnikkut naligiissaarineq, oqallisigineqassapput.
