Inatsisartuni ullormut pisussat
Siullermeerneqartussani marluusuni, nunatsinni aningaasaqarnermik suliaqarnerup nunani tamalaani tamatuminnga suliaqarnermut malittarisassiornermut kingullermut naapertuuttunngortitsinissaq pineqarpoq.
Inatsisissatut siunnersuutit naalakkersuisumit Vittus Qujaukitsumit saqqummiunneqassapput, taakkulu aqqutigalugit nakkutilliinikkut aaqqissuussinerit Danmarkimi atuuttut assingi nunatsinni atuuttussanngortinneqarnerisigut nunatsinni aningaaseriviit tatigineqarneri nukittorsarniarneqarput.
Apeqquteqaatillu aallaavigalugit oqallinnerit marluk ualimut ingerlanneqassapput.
Inuit Ataqatigiinneersup Naaja H. Nathanielsenip tamat oqartussaaqataaneranni atugassarititaasut oqallisigitikkusuppai, innuttaasut suliniaqatigiiffiillu peqataatinneqarnissaannut kiisalu tusagassiuutit inissisimanerannut tunngatillugu tamat oqartussaaqataanerisa nukittorsaavigineqarnissaannut suliniutaasut pitsanngorsarnissaat siunertaralugu.
Inuit Ataqatigiinneersoq Kalistat Lund assingulaartumik apeqquteqaat aallaavigalugu oqallinnissamik aamma siunnersuuteqarpoq, tassalu aatsitassarsiornermik suliniutinut nutaanut tunngatillugu innuttaasut pitsaanerusumik paasissutissiivigineqartarnissaanut siunnersuuteqarnissaq oqallisigineqassalluni.
- Aatsitassarsioqatigiit aatsitassanik misissuiniarneranni aammalu misissuinerit suli ingerlagallarneranni innuttaasunik oqimaaqatigiissumik paasissutissiisoqartarnissaa siunertarineqartoq, Kalistat Lund taama allappoq.
Taanna isumaqarpoq innuttaasunik ataatsimiititsinerit arlaannaanulluunniit attuumassuteqanngitsumit ingerlanneqartariaqartut, taamaaliornikkut paasissutissiinerup oqimaaqatigiissuunissaa qulakkeerniarlugu, IA-meersoq Inatsisartuni oqallissaarutimini taama allappoq.
