Inatsisartuni ullormut pisussat
Siunnersuut partiinit tamanit taperserneqarpoq meeqqanillu pinerliisimannginnermut uppernarsaatinik piumasaqaateqartussaanerup sullissivinnit attuumassuteqartunit tamanit malinneqarnissaa siunertaralugu ilitsersuutissanik suliaqartoqareersoq Naalakkersuisut ilisimatitsissutigaat.
Ullormut oqaluuserisassani immikkoortut tullianni Partii Naleqqameersup Hans Enoksenip Upernaviup nunaqarfiisa avannarlersaanni Kullorsuarmi meeqqanik paaqqinnittarfeqarnikkut pitsaanerusunik atugassaqartitsinissaq siunnersuutigaa. Kullorsuarmiut affaat sinnerlugit - katillugit 250-it - tassaapput meeqqat inuusuttullu. Taakkununngali ulluunerani paaqqinnittarfeqanngilaq, tamannalu allanngortinneqartariaqartoq Partii Naleraq isumaqarpoq.
Siunnersuut partiinit naalakkersuisuutitaqartunit itigartinneqartussatut innersuussutigineqarpoq, kommunit suleqatigalugit nuna tamakkerlugu suliassaqarfimmi pisariaqartitsinermik nalilersuinissaq pilersaarutigineqareermat. Siunnersuut Partii Naleqqamit Inuit Ataqatigiinniillu tapersersorneqarpoq.
Tulliullugu eqqartorneqartussaq tassaavoq Atassummit siunnersuutigineqartup aappaassaaneerneqarnera, tassalu inuusuttunut timersornikkut piginnaasaqarluartut eqqarsaatigalugit timersornermik ingerlatsinerup saniatigut ilinniakkamik ingerlatsinnaanissaat eqqarsaatigalugu timersornermut højskolemik pilersitsisinissamik siunnersuut.
Siunnersuut Naalakkersuisunit taperserneqarpoq, piumasaqaatigaluguli Nunatsinni højskolit pioreersut oqaloqatigineqassasut timersornermik annerusumik sammisaqalernissaq soqutigineraat paasiniarlugu.
Tamatumunnga tulliullugu, SIKUKI Nuuk Harbour A/S aamma Nuummi umiarsualiviliorneq pillugu Inatsisartut inatsisaat aappassaaneerneqassaaq. Inatsisissatut siunnersuut ukiakkut ataatsimiinnermi saqqummiunneqarpoq maannalu suliareqqinneqassalluni. Nuummi nutaamik umiarsualiviliornissamik pilersaarutit taamani Inatsisartut isumaqatigiissut taperserpaat, maannalu umiarsualivissap sanaartorneqarnissaa ingerlanneqarnissaalu oqaluuserineqartussanngorpoq.
Aammattaaq akuulersitsiniarneq oqaluuserineqassaaq. Inuit Ataqatigiinneersup Juliane Henningsenip oqaatsit pillugit inatsit qanoq sunniuteqarsimanersoq apeqqutigaa. Peqatigitillugulu nunatsinni inuiaqatigiinnut, kulturimut, ileqqunut, peqatigeeriaatsinut naleqartitanullu tunngatillugu assigisaanik malittarisassiortoqartariaqarnersoq aamma apeqqutigaa.
