Inatsisartuni ullormut pisussat
Naalakkersuisut siunnersuutaat katillugit arfineq-marluk inaarutaasumik oqaluuserineqassaapput.
Ullormut oqaluuserisassani immikkoortoq siulleq tassaavoq Qaasuitsup Kommuniata avinneqarnissaanik siunnersuut. Illoqarfiit kommunip avannarpasinnerusortaaniittut Ilulissallu immikkut kommuninngornissaat, kujasinnerusumiittullu Qeqertarsuaq peqatigalugu immikkut kommuninngornissaat Naalakkersuisunit siunnersuutigineqarpoq. Inatsisinut ataatsimiititaliami amerlanerussuteqartut siunnersuutigineqartoq akuersissutigineqartussatut inassutigaat, Demokraatit minillugit, taakku isumaqaramik kommunip avinniarneqarnera tuaviupiluunneqartoq.
Tamanna pereerpat missingersuutit naatsorsuutillu pillugit inatsisissatut siunnersuut politikkikkut pingaarnersiuinermut killiliussanik ersarissunik imaqartoq Inatsisartut pingajussaaneerlugu oqaluuserissavaat. Aningaasaqarnermut akileraartarnermullu ataatsimiititaliap isumaqatigiissup siunnersuutigineqartup akuersissutigineqarnissaa inassutigaa.
Oqaluuserisassat kingulliup tulliattut aningaasanut inatsisissatut siunnersuut pingajussaaneerneqassaaq. Partiit naalakkersuisooqatigiittut Atassullu isumaqatigiissummik atsioqatigiissuteqareerput.
Oqaluuserisassallu kingullersaat tassaavoq Nunatsinni tunngaviusumik
inatsiseqalernissaanik siunnersuusiortussamik isumalioqatigiissitamik pilersitsinissaq pillugu Inatsisartut Naalakkersuisunut piginnaatitsissummik tunniussinissaat siunertaralugu Inatsisartuni aalajangiiffigisassatut siunnersuut.
Inatsisartuni ullormut oqaluuserissaat pillugit paasisaqarnerorusukkuit tamanna Inatsisartut nittartagaatigut pisinnaavoq.
