Inatsisartuni ullormut pisussat
Taamaalereerpat oqaluuserisassatut siunniunneqartut pilersaarutit naapertorlugit tallimaassapput.
Inatsisartut Ombudsmandiata 2013-imut ukiumoortumik nalunaarutaata Inatsisartunit tusaatissatut tiguneqarnissaanik Inatsisartut aalajangiiffigisassaattut siunnersuut aallarniutigereerunikku, Aalisarnermut inatsimmut allannguutissatut siunnersuut taava pingajussaaneerneqassaaq.
Inuussutissarsiutigalugu aalisarsinnaanermut akuersissutit tunniunneqartarnerat ingerlaannartarnerallu pillugit allannguutit matumani aalajangiiffigineqassallutik.
Partii Naleraq sinnerlugu Inatsisartuni ilaasortap Anthon Frederiksenip apeqquteqaat aallaavigalugu oqallittoqarnissaanik siunnersuutaa taava tullinnguutissaaq. Tassa qanoq iliornikkut aalisartunut piniartunullu atortuminnik piniutiminnillu ajunaarnersuaqartillugu annaasaqarsimasunut pisortaniit ikiorsiisarnerup nukittorsarneqarsinnaanera pillugu Anthon Frederiksen apeqquteqaat aallavigalugu oqallissaaruteqarami.
Taava allaffissornikkut ingerlatsiviup atugarisai aaqqissugaaneralu pillugit apeqquteqaat aallaavigalugu oqallisissiamik siunnersuummik allamik siunnersuuteqartoqarpoq, tassa Naaja Nathanielsenip oqallisissiatut siunnersuutigaa ullumikkut pisortaqarfeqarnikkut aaqqissugaanerput nukissanik atuiffiulluarlunilu inuiaqatigiit angissusaannut kulturiannullu naleqqusagaanersoq Naaja Nathanielsenip apeqquteqaatigaa.