Inatsisartuni ullormut pisussat
2013-imut Nunatta karsiata naatsorsuutaasa akuersissutigineqarnissaannik siunnersuut siullertut oqaluuserineqassaaq, Aningaasaqarnermut Aatsitassanullu Naalakkersuisoq Andreas Uldum saqqummiussisuussalluni.
Taamaalereerpat oqaluuserineqartussatut siunnersuutit pingasut ataqatigiissillugit oqaluuserineqassapput, tassa immikkoortut 74, 75 aamma 76 ataqatigiissillugit oqaluuserineqartussaagamik.
Immikkoortut 74, 75 aamma 76 Ineqarnermut, Sanaartornermut Attaveqaqatigiinnermullu Naalakkersuisumit Knud Kristiansenimit saqqummiunneqassapput, Imarsiornerup isumannaatsuunissaa pillugu inatsisit allannguutaat ilaatigut oqaluuserineqassallutik.
Raajanut qaleralinnullu pisassiissutit killeqanngitsumik piffissalerlugit pigineqartarnerat pillugu inatsisip allanngortinneqarneratigut ukiunik tallimanik sioqqutsisumik ilimasaaruteqarnikkut killilerneqartalersinnaanerannut aningaasaqarnikkullu kinguneqaatissat ilanngullugit Nikolaj Jeremiassenip Siumumeersup siunnersuutaa, Inatsisartut ullut ataatsimiiffiisa pingajuanni naggasiutigalugu oqaluuserisussaavaat.