Inatsisartuni siulittaasoqarfik: Malittarisassat malillugit sulivugut.

Demokraatit siulittaasuata Per Berthelsen-ip sapaatip akunnerata naanerani Inatsisartuni siulittaasoqarfik uparuarpaa, naalakkersuisoqatigiinnut kisimi sullissinerarlugu. Tamannali pasilliineq siulittaasoqarfimmi siulittaasup tulliata Agathe Fontain-ip pissutissaqannginnerarpaa.

Finn Karlsen-ip inatsisartuni tallimanngormat aalassatsitsinerata kingunerisaanik inatsisartuni sulineq akunnernik pingasunik kingusinaarluni aallartippoq. Ataatsimiinnerup aallartinnerata kinguartinneqarnera peqqutigalugu Demokraatineersup Per Berthelsen-ip inatsisartuni oqaluuserisassanngortitami marluk kinguartinneqarnissaanik qinnuteqaraluarpoq. Kinguartitsiniarnerali siulittaasoqarfimmit itigartinneqarpoq, inatsisartullu ataatsimiinnertik unnukkut arfineq pingasut qaangernerani aatsaat naammassivaat.

Per Berthelsen-ip siulittaasoqarfik uparuarpaa, tamanut atuunnani Naalakkersuisoqatigiinnut kisimi atuuttuuneralugu, partiinullu tapiissutaasartut unnukkut eqqartorneqartut tusagassiortunik najuuttoqannginnerata nalaani eqqartorneqarusussimasut.

Siulittaasoqarfimmi siulittaasup tulliata Agathe Fontain-ip pasilliutit pissutissaqannginnerarpai.

-Per Berthelsen aallartussaammat siulittaasoqarfimmit aalajangerpugut kinguartitsiniarnera itigartinniarlugu. Inatsisartut aamma taasitinneqarlutik aalajangerpaat ataatsimiinneq naammassinissami tungaanut ingerlassasoq, tassani amerlanerussuteqartut akuersilutik.

Inatsisartut siulittaasoqarfianni aamma naalakkersuisooqatigiit kisiisa sullisinngilagut, malittarisassat maleqqissaarlugit sulisarput, Agathe Fontain oqarpoq.

Inatsisartuni tallimanngormat eqqartorneqartut suli aalajangiiffigineqanngillat. Demokraatit siunnersuutigisaat marluk, tassalu partiinut tapiissutit ikilisinneqarnissaat, politikkikkullu qinikkat marlunnik atorfeqartannginnissaat tamarmik itigartitsissutigineqarput. Siunnersuutigineqartulli ataatsimiinnerup ingerlanerani suli marloriarlutik eqqartorneqaqqittussaapput.