Inatsisartuni sisamanngornermi pisussat
Oqaluuserisassat qulingiluat akornanni marluk siullermeerinerussapput, tallimat aappassaaneerinninnerit, apeqqutaallu aallaavigalugu oqallinnissamik siunnersuutit marluk.
Inatsisartuni naalakkersuisunilu ilaasortat aningaasarsiaqartitaanerat pillugu inatsimmut allannguutissatut siunnersuut oqaluuserineqartussanut ilaassaaq, soorlu aamma qarasaasiami nassatassamillu nunatsinni kinaassutsimut ilisarnaammik peqalernissamut inatsisiliortoqarnissaanut siunnersuut oqaluuserineqassasoq.
Inatsisartunut qinersisarnermi qinersiviit ammanerulersinneqarnissaannut anguniarlugu Inatsisartunut qinersisarnermi inatsisip allanngortinnissaa pillugu apeqquteqaat aallaavigalugu oqallisissiaq oqaluuserineqassaaq, soorlu aamma pisortat allaffeqarfiini siunertaasutut oqaatsit ataasiinnaat atorneqalernissaat suut aporfiusinnaasut pillugit apeqquteqaat aallaavigalugu oqallisissiaq Inatsisartunit aamma oqaluuserineqassasoq.
Inatsisartut ataatsimiinneranni oqaluuserisassat pillugit paasissutissat sukumiinerusut Naalakkersuisut nittartagaanni atuarneqarsinnaapput, ataatsimiinnerallu KNR-ikkut toqqaannartumik malinnaavigineqarsinnaalluuni.
