Inatsisartuni sisamanngornermi pisussat
Akitsuutip umiarsuarnut Nunatsinni nalunaarsorneqarsimasunut atuuttup maanna kiilumut 95 øriusup, 40 ørinut appartinneqarnissaa Aningaasaqarnermut naalakkersuisup Aqqaluaq B. Egedep siunnersuutigaa. Umiarsuarnullu Nunatsinni nalunaarsorneqarsimanngitsunut akitsuutip kiilumut 1,50 koruuninit 1 koruunimut appartinneqarnissaa siunnersuutigaa.
Tamannalu nunatta karsianit 40 millionit koruunit missaannik iluanaaruteqarfiunissaa Naalakkersuisut neriuutigaat.
Siunnersuullu taperserneqarpoq. Siunnersuutilli kattuffinnut susassaqartunut ullut arfineq-marluinnaat periarfissaritillugit tusarniaassutigineqarsimanera Inatsisartut Aningaasaqarnermut Akileraartarnermullu ataatsimiititaliaata sakkortuumik isornartorsiorpaa.
Ullormut oqaluuserisassani tulliullugu oqaatsit pillugit oqallittoqassaaq.
Inuit Ataqatigiinneersup Mimi Karlsenip oqaatsinut kiffartuussivimmik pilersitsoqarnissaa siunnersuutigaa, kiffartuussiviullu tusagassiorfiit, ilaatigut KNR-ip, oqaatsitta pitsaanerusumik atuiffiunissaannik ikiuiniartussaassaaq.
Taamatut aaqqissuussineq Islandimi iluatsittumik misilittagaqarfigineqarpoq, innuttaasunik kiffartuussivik RUV oqaatsit eqqortumik atorneqarnissaannut ilitsersorneqarnissamik pisariaqartitsiffiusimammat, Mimi Karlsen siunnersuutimini taama allappoq.
Siunnersuutip akuersissutigineqarnissaa Naalakkersuisut inassutigaat, kiffartuussiviullu Oqaasileriffiup ataani inissimanissaa pissusissamisuussasoq oqaatigalugu.
Brintimik nukissiuteqarnissamik siunnersuut aamma sisamanngornermi oqaluuserineqassaaq.
Siunnersuutip itigartitsissutigineqarnissaa Naalakkersuisut inassutigaat. Siornatigummi iluatsinngitsumik misiliutigineqareersimavoq. Nukissiorfiillu suliassaqarfimmi piginnaasat pisariallit maannakkut piginagit nalunaarsimapput.
Siumumeersup Laura Táunãjiip tunumiut kalaallisuuinik kalaallisuuliornermik ilinniarfissamik Tasiilami pilersitsisoqarnissaa siunnersuutigaa. Naalakkersuisullu siunnersuutigaat kalaallisuuliornermik ilinniarfissaq Tasiilami ingerlariaqqiffiusumik ilinniarfimmik pilersitsinissamik pilersaarutigineqartumut ilaatinneqassasoq.
Ullormut oqaluuserisassani kingullertut Siumumeersup Nikolaj Jeremiassenip kitaani raajanut TAC-ip agguaanneqarnerani sinerissap qanittuani aalisartunut avataasiortunullu assigiimmik 50/50-ngortitsoqarnissaanik siunnersuutaa oqaluuserineqassaaq. Naalakkersuisut siunnersuut imaaliallaannarlutik tapersinngilaat Inatsisartunili oqaluusereqqinneqarnissaa innersuussutigalugu.
