Inatsisartuni sisamanngornermi pisussat
Tasiilami inunnik isumaginninnikkut pissutsit pitsanngorsarneqarnissaat qulakkeerumallugu ukiumut 5 milliuunit koruuninik immikkoortitsisoqartarnissaanut siunnersuut Demokraatineersunit saqqummiunneqassaaq.
Oqaluuserisassani aappaattut angajoqqaarsiat atugaasa pitsanngorsaavigineqarnissaannut tunngasoq oqaluuserineqassaaq. Angajoqqaarsiaasartut aningaasat tigusartagaasa qaffaavigineqarnissaat aningaasartuutaasartullu ullutsinnut naleqqussarneqarnissaat pillugit Siumumit siunnersuutigineqarpoq.
Meeqqat atuarfianni atuarnermut ilaatillugu sungiusaammik sulinermi assigiimmik sillimmaserneqarnissaat pillugu siunnersuut pingajuattut Inuit Ataqatigiinnit saqqummiunneqassaaq.
Inatsisartuttaaq imaatigut angallannermi tunngasut oqaluuserissavaat. Nunatsinni angallatit umiarsualivinni talinnerini avalattussanngornerinilu ilanngaaserisut misissuisarnerisa nukittorsarneqarnissaat pillugit Naalakkersuisut nalunaarusioqqullugit peqquneqarnissaannik Inatsisartut aalajangiiffigisassaattut siunnersuut, Siumup gruppiannit saqqummiunneqassaaq.
Oqaluuserisassani kingullertut tassaavoq Kujataani Itilliarsuup ikerasaliorneqarneratigut imaatigut angallannikkut isumannaallisaasoqalernissaa anguniarlugu siunnersuut.
Naalakkersuisooqatigiit isumaqatigiissutaat naapertorlugu Kujataani Itilliarsuup ikerasaliorneqarnissaanik Naalakkersuisut suliniuteqarnissaannik peqquneqarnissaat pillugu siunnersuut Inuit Ataqatigiinneersumit saqqummiunneqassaaq.
Inatsisartuni oqaluuserisassat inatsisartut.gl-imi atuarneqarsinnaapput.
