Inatsisartuni sisamanngornermi pisussat
Oqaaserlu nutaaq ilinniartussanngorparput, tassalu procenti aaqqiissutissaq.
Procenti aaqqiissutissaq pillugu inatsisissatut siunnersuummi pisortat innuttaasunut aningaasat tunniuttagaasa arlallit nalikillinnginnissaat anguniarneqarpoq, aningaasat naleerukkiartornerat pisissutaasinnaanerisalu appariartornerat ilutigalugu nalimmassarneqartassallutik.
Taamatullu nalimmaassaaneq utoqqalinersianut ullumi atuutereerpoq, meeqqanulli tapiissutinut, meeqqanut akilersuutinut aamma akileraarutit akitsuutillu ilaannut atuutsinneqarani.
Tamanna Naalakkersuisut maanna iliuuseqarfigaat. Siunissami ukiumut ataasiarluni procentimik aaqqiissutaasumik, Naatsorsueqqissaartarfimmit naatsorsorneqartumik, tamanut saqqummiussisoqartarnissaa inatsisissatut siunnersuutikkut siunniunneqarpoq. Procenti aaqqiissutaasoq pisortani akissarsiat ineriartornerat aallaavigalugu naatsorsorneqartassaaq.
Ullormut oqaluuserisassani immikkoortut aappaattut Namminersorlutik Oqartussat suliffeqarfiutaanni NunaOil A/S-imi ingerlatat annikillisinneqarnissaat oqaluuserineqassaaq. Ikummatissiassanut suliassaqarfimmi ingerlataqarnerit nunarsuaq tamakkerlugu annikilliartornerat pissutigalugu ingerlatseqatigiiffik naleqqussarneqassaaq.
Suliassaqarfiit Danmarkimit Namminersorlutik Oqartussanut nuunneqarnerinut atatillugu sulisut pitsaasumik pineqartarnissaasa qulakkeerneqarnissaa immikkoortut pingajuattut oqaluuserineqassaaq. Assersuutigalugu suliassaqarfiup Danmarkimit Namminersorlutik Oqartussanut nuunneqarnera kisiat tunngavilersuutigalugu sulisunik soraarsitsisoqarsinnaassanngilaq.
Ullormut oqaluuserisassani immikkoortoq kingulleq Det Centrale Virksomhedsregisterimi nalunaarsorneqartarneq pillugu Inatsisartut inatsisaanni teknikkikkut oqaasertaliussatigullu allannguinermut tunngassuteqarpoq.
