Inatsisartuni pisimasoqarfioqaaq
Inatsisartut ukiaanerani ullut ataatsimiiffiisa kingullersaanni inernerit qanoq nalilerneqarsinnaanersut oqallisaataasinnaapput.
Siumukkut politikkikkut oqaaseqartuat Lars-Emil Johansen kiisalu Kuupik Kleist Inuit Ataqatigiinneersoq isumaqarput naalakkersuisooqatigiit angusisimasutut nalilerpaat.
Inatsisartut ukiami ataatsimiinneranni naggataarnersiortoqarmat ulloq pisimasoqarfioqaaq.
Peqqissutsimut avatangiisinullu naalakkersuisuusimariarluni Inuit Ataqatigiinneersoq Asii Chemnitz Narup nammineq tunuarniuteqarmat kiisalu kultureqarnermut ilinniartitaanermullu naalakkersuisuusimasoq Siumumeersoq Doris Jakobsen naalakkersuisut siulittaasuannit Hans Enoksenimit tunuartitaalluni.
Hans Enoksenip aalisarnermut piniarnermullu naalakkersuisuugallarnermini eqqunngitsuliorsimasutut nalilerlugu tatiginnikkunnaarnermik taasinissaq Demokraatit piumasarigaluarpaat, tamannali pinngitsoortinneqarpoq.
Demokraatit politikkikkut oqaaseqartuata Palle Christiansenip tamanna akueriumanagu kamaammerluni nerrivik tilluppaa, naalakkersuisullu siulittaasuat Hans Enoksen diktatoriusutut suaarutigalugu.
Kommunit 2009-mi kattussuunneqarnissaat pillugit taaasisitsisoqarpoq, Atassutikkullu qanoq taasiniarnersut oqallisaasimaqaaq, kommunilli kattussuuneqarnissaannut akuersipput, ilaasortaatitartilli ataatsip Augusta Sallingip siunnersuut akueriumanagu taaseqataaffiginngilaa.
