Inatsisartuni pingasunngornermi pisussat
Siunnersuutigineqartormi Inatsisartuni aappassaanerlugu ullumi oqaluuserineqassaaq. Inatsisartut kultureqarnermut ataatsimiititaliaat allannguutissamik siunnersuuteqarpoq siunnersuutillu akuersissutigineqarnissaa inassutigalugu.
Allannguummi KNR peerneqarpoq, Naalakkersuisullu peqquneqarput Inatsisartut ataatsimiinnerisa nuna tamakkerlugu radiukkut aallakaatinneqartarnissaat sulissutigeqqullugu, KNR suliassamik tamatuminnga isumaginnittussatut piumasaqaateqarfiginngikkaluarlugu.
Akileraartarneq pillugu siunnersuutit pingasut aamma oqaluuserineqassapput. 2018-imut akileraartarnikkut ilanngaatit siornatuulli angissusilerneqarnissaat ilaatigut oqaluuserineqassaaq, aamma akileraarutinik assigiinngitsutigut minnaariniartarneq ajornarnerulersinniarlugu akileraartarnermi malittarisassat assigiinngitsut allanngortinneqarnissaat siunnersuutigineqarpoq.
Tasiilami mittarfiliornissamik suliassap Kalaallit Airports A/S-ip ataani suliassanngortinneqarnissaanik siunnersuut aamma oqaluuserineqassaaq.
Ullormut oqaluuserisassani immikkoortut katillugit arfineq-pingasuupput, tamatumalu saniatigut Naalakkersuisuni ilaasortamik pingasunngornikkut ileqquusumik akunnermi ataatsimi apeqqarissaartoqassalluni. Naalakkersuisut siulittaasuat Kim Kielsen ullumi apeqqarissaarfigineqassaaq.
