Inatsisartuni oqaluttuarisaanermi pingaarutilik ullumi pivoq
Inatsisissatut siunnersuut pingajussaaniigassaq tamanit oqallisigineqangaatsiarsimavoq.
Inatsisartut inuussutissarsiornermut ataatsimiititaliaata siunnersuut sukumiinerusumik suliariniassammassuk siunnersuutip aappassaaneerneqarnissaa kinguartinneqarpoq, ullumilu tassa pingajussaaneerneqartussaalluni.
Aappassaaneerneqarnissaanut atatillugu allannguutissatut siunnersuutit 21-t inatsisartuni ippassaq oqallisigineqarput.
Suliniutit angisuut Nunatta aningaasaqarniarneranut siunissami pingaaruteqartorujussuusinnaammata, siunnersuut soorunami pingaaruteqartorujussuuvoq.
Aningaasat aatsitassarsiornermit kaaviiaartitat Nunatsinnut sapinngisamik iluaqutaanerunissaat pillugu inatsisitigut sinaakkusiortoqarnissaa pillugu isumaqatigiinniartoqangaatsiarsimavoq.
Piginneqatigiiffissuit aatsitassarsiornermut atatillugu sulisunik Nunatsinneersunik, suliffeqarfinnillu Nunatsinneersunik sapinngisamik atugaqarnissaat inatsisitigut toqqammavilersorniarneqarpoq.
Sulisut nunani allaneersut akissaarsiaat sulinermikkullu atugaat pillugu oqallittoqangaatsiarpoq, soorlu aamma piginneqatigiiffissuit akileraarusersorneqarnissaat pillugu oqallittoqangaatsiartoq.
Oqallinnermili aporaaffeqanngitsuunngilaq, aalajangiiffigisassammi oqittuinnaasimanngillat.
Suliniutimmi angisuut pillugit inatsisissaq akuersissutigineqarpat, partiit illuatungiliuttuni annersaat, Siumut, inatsisissamut taaseqataanianngilaq.
Siumut isumaqarpoq inatsisissatut siunnersuut kinguartinneqartariaqartoq, allannguutissatut suinnersuutit Inuussutissarsiornermut ataatsimiititaliami suliarilluarneqarsinnaaniassammata.
Siumullu isornartorsiunermi kisimiinngilaq. ICC-p tusagassiutinut nalunaarummi ilaatigut oqaatigaa suliniutinut angisuunut inatsisissatut siunnersuut tuaviussaavallaartoq, peqqissaarnerusumillu suliarineqarsimasinnaanerarlugu.