Naalakkersuisut katitigaanerannut tunngasunik, aaqqissuusseqqinnissamik, aammalu meeqqanut inuusuttunullu naalakkersuisussamik ikkussinissamut siunertaqartumik qinnuteqaateqarsimallunga, Múte B. Egede oqarpoq, Eqaluk Høeghillu (IA) meeqqanut inuusuttunullu naalakkersuisutut qaammatip ataatsip matuma siorna tunuarnera innersuussutigalugu,Assi: Malik Brøns / KNR

Inatsisartuni naalakkersuisumik aqqanermut toqqaasoqassasoq

Inatsisartut ullumikkut nutaamik oqaaserisassaqarput. Naalakkersuisut meeqqanut inuusuttunullu naalakkersuisumik nutaanik aalajangiissapput, Pele Brobergilu nunanut allanut tunngasunut naalakkersuisoqarfimmiikkunnaarsinneqassagunarluni.

Inatsisartuni ullumi nalunaaqutaq aqqanermut immikkoortumik nutaamik oqaluuserisasaqarput.

Immikkoortup taaguutigaa: Naalakkersuisunik qinersineq.

Naalakkersuisut siulittaasuata, Múte B. Egedep (IA) meeqqanut, inuusuttunut ilaqutariinnullu Eqaluk Høeghimut qaammatip ataatsip matuma siorna tunuartumik paarlaasussamik naalakkersuisunngortoqarumaartoq tallimanngormat oqaatigimisaarpaa.

Naalakkersuisunili aamma nikititerisoqarsinnaavoq.

Pele Broberg nunanut allanut tunngasunut naalakkersuisuujunnaassasoq, kisianni inuussutissarsiornermut, niuernermut silallu pissusianut naalakkersuisuuginnassasoq Sermitsiaq.ag allappoq.

Sermitsiaq.ag-p paasissutissaatai naapertorlugit tallimanngormat taama aalajangertoqarpoq.

AAMMA ATUARUK Medie: Pele Broberg mister udenrigsområdet

Tassalu Pele Brobergip inuiannit Inunnit kingoqqisuusut kisimik nunatta namminiilivinnissaanut siunissami taasititsinissami taasisinnaasariaqarnermik danskit aviisiannut Berlingskemut sapaatit akunnerata siuliani oqarnera kinguneqartussanngorpasippoq.

Brobergip oqaasii Naalakkersuisut politikkerinngikkaat Naalakkersuisut siulittaasuat, Múte B. Egede naqqiuteqarluni sapaatiummat allappoq.

Partii naalakkersuisoqatigiinnut ikorfartortaasoq, Atassut, Broberg tatigiunnaarlugu Naalakkersuisunullu ilaasortani nikititsisoqartariqarsoralugu kingorna nalunaarpoq.

Nikititsisoqartussanngorpasittoq

Múte B. Egede Brobergip oqaasii Naalakkersuisunut sunniuteqassanersut pillugu aatsaat sapaatit akunnerisa tulliani oqaaseqarniarluni tallimanngormat oqarpoq.

- Aatsaannguarlu oqalugiarnini ilimasaarivunga, sapaatip akunnerata tulliata aallartinnerani Inatsisartut siulittaasoqarfiannut massakkut qinnuteqarlunga, Naalakkersuisut katitigaanerannut tunngasunik, aaqqissuusseqqinnissamik, aammalu meeqqanut inuusuttunullu naalakkersuisussamik ikkussinissamut siunertaqartumik qinnuteqaateqarsimallunga, Múte B. Egede tallimanngormat oqarpoq.

AAMMA ATUARUK Ukiakkut ataatsimiinneq aallartippoq: Broberg ammaanersiornermi oqalugiaammi eqqaaneqanngitsoq

Sermitsiaq.AG-p allaaserisaa KNR-ip uppernarsartinniarsarigaluarpaa. Oqaloqatiginiakkagulli ilaat attavigisinnaasimanngilagut, attavigisagullu oqaaseqarusunnatik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl