Inatsisartuni marlunngornermi pisussat
Kalaallit Nunaannut suliffissarsiortut killilersimaarnissaat pillugu inatsimmut allannguutissatut siunnersuutip aappassaaneerneqarnissaa aallarniutigineqassaaq.
Inatsisip sukaterneqarnissaa Inatsisartuni partiinit amerlanerussuteqartunit tapersersorneqarpoq.
Suliffiit namminersortut isumaqarput inatsisip sukaterneqarnera avataanit suliffissarsiornermut kinguneqarnerlussinnaasoq, Demokraatillu ikinnerussuteqartut sinnerlugit tamanna isumaqatigaat.
Naallu partiit sinneruttut allannguutissatut siunnersuummut tapersersuigaluartut, allannguutissatut siunnersuutip kingunerisinnaasaasa nakkutigineqarnissaat neriorsuutigaat.
Meeqqat atuarfiat pillugu inatsimmut allannguutissatut siunnersuut taava aamma aappassaaneerneqassaaq, atuartitsinerup imarisaa, aaqqissuussaaneq, piareersaaneq ilisimasanillu katersisarneq pillugu malittarisassanik allannguineq ilaatigut oqaluuserineqassalluni.
Piginneqatigiilluni inissiat pillugit inatsit aappassaaneerlugu aamma oqaluuserineqassaaq, taamaalereerpallu 2017-imut Nunanut allanut tunngasutigut naalakkersuinikkut ingerlatsineq pillugu nassuiaat naalakkersuisunit saqqummiunneqarumaarluni.
Immikkoortut marluk allat aamma oqaluuserineqarumaarput, Inatsisartullu nittartagaanni takuneqarsinnaapput, ataatsimiinnerallu KNR-ikkut nalunaaqutaq aqqanermiit toqqaannartumik malinnaavigineqarsinnaalluni.
