Inatsisartuni marlunngornermi pisussat
Inatsisartut upernaakkut ataatsimiinneranni ullut ataatsimiiffiusussat arfineq-pingasuinnanngorput, siunnersuutillu pingajussaaneerneqartussat arlaqarput taakkulu ullumikkut akuersissutigineqarnissaat naatsorsuutigineqarluni.
Taakku ilagaat sulisunut inissiap piffissap qanoq sivisutigisup qaangiunnerani inissiatut nalinginnaasumik attartortakkatut tigunissaanut malittarisassat allanngortinneqarnissaat. Ukiut arfineq-marluk najugaqarfigisimanissaanik piumasaqaatip ukiunut tallimanut allanngortinneqarnissaa tapersersorneqarpoq.
2016-imut ilassutissatut aningaasaliissutinut inatsisissatut siunnersuut aamma piareerpoq, aamma Ombudsmandip sulianik meeqqanut allanullu paaqqinnittarfinni namminersortuniittunut tunngasunik siunissami misissuisinnaatitaanissaa aamma tapersersorneqarpoq. Aammattaaq akileraartarnermi malittarisassanut pitsanngorsaatissat nutaat arlallit ullumi pingajussaaneerneqalerpata Inatsisartunit amerlanerussuteqartunit taperserneqarnissaat naatsorsuutigineqarput.
Aamma Nunatta Islandimi sinniisoqarfeqalernissaa ilimanaateqartupilussuuvoq. Tamanna Nunatta Islandillu akornanni ukiorpassuarni suleqatigiinnikkut atassuteqarnerup nukittorsarneqarnissaanik ineriartorteqqinnissaanillu siunertaqarpoq.
Siunnersuut ullumi aappassaaneerneqassaaq, siullermeerneqarmallu amerlanerussuteqartunit taperserneqarpoq. Islandimilu aallartitaqarfittut ittumik sinniisoqarfiliornissamut aningaasartuutissat 2,5 millionit koruuniusut partiinut arlaannaanulluunniit nangaalersitsimarpasinngillat.
Atlantikup avannaani suleqatigiinneq pillugu aamma allamik oqaluuserisaqartoqassaaq. Nunatsinni, Islandimi Savalimmiunilu nunat avannarliit killiit efterskoliinik pilersitsinissamik Nunat avannarliit killiit siunnersuisoqatigiiffiata siunnersuutaa aappassaaneerneqassaaq.
Lars-Emil Johansenip siunnersuutaa Naalakkersuisut pissanganartippaat, nunavut suleqatigiillutik efterskolimik ataatsimik arlariinnilluunniit inuusuttatta pikkorissaqatigiillutik naapeqatigiiffigisinnaasaannik pilersitsisoqarsinnaasuuppat tassuunatigullu inooriaatsitsinnik, kulturitsinnik ileqqutsinnillu assigiinngiiaartunik paarlaateqatigiissinnaalerlutik.
Inatsisartut ullumikkut ataatsimiinnerat naggaserlugu apeqquteqaat aallaavigalugu oqallittoqassaaq. Tamatuminnga siunnersuuteqartuuvoq Inuit Ataqatigiinneersoq Villy Olsvig. Qanoq qimmit qimuttut ikiliartuinnarnerat mumisinneqarsinnaanersoq qanorlu qimussertarnerup nukittorsarneqarsinnaanera pillugu Inatsisartut isumaat tusarusuppaa.
