Inatsisartuni marlunngornermi pisussat
Oqaluuserineqartussani siulleq tassaavoq pisortat ingerlatsinerat allagaatinillu paasitinneqarsinnaatitaaneq pillugit inatsisitigut aalajangersakkat allannguutaasa aalajangiiffigineqarnissaat.
Nunatta Islandimut attaveqarluarnissaa pillugu oqaluuserisassaq aappaattut saqqummiunneqassaaq.
Islandimi kalaallit sinniisoqarfiannik pilersitsinissamut atatillugu ineriartortitsilluarnissamut qulakkeerinninnissaq pillugu Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu
allanut Naalakkersuisoq saqqummiussissaaq.
Tamatuma saniatigut naalakkersuisunut ilaasortap nangiinnarlugu upalungaarsimanermut inatsimmi aalajangersakkat atuutilersinneqarnissaat pillugu aalajangiiffigineqartussaq saqqummiutissavaa.
Oqaluuserineqartussani kingullermi inatsisartuni ilaasortaq Debora Kleist utoqqaat pillugit saqqummiussissaaq.
Tassa utoqqarnut immikkut siunnersuisarfimmik pilersitsinissamik pisariaqartitsineq saqqummiunneqassaaq.
Siunnersuisarfimmik pilersitsinissamut siunnersuut naapertorlugu kommuninik kingusinnerpaamik 2017-imi oqaloqatiginninnissamik Naalakkersuisut peqquneqarnissaat pillugu aalajangiiffigisassatut siunnersuut oqaluuserineqassaaq.
Taamaalilluni utoqqaat siunnersorneqartarnerisa patajaallisarneqarnissaannut aningaasaliinissamullu periarfissat kingusinnerpaamik upernaami 2018-mi allakkatigut Inatsisartunut nalunaarusiariniarneqarput.
Inatsisartuni oqaluuserisassat inatsisartut.gl-imi atuarneqarsinnaapput.