Inatsisartuni malittarisassat nutarterneqarput
Apeqqutinik uteqattaarineq qaangiutissaaq aamma siunnersuutinik, allaganngorlugit agguaateriikkanik, oqaluttarfimmiit saqqummiussinerit ikilisinneqassapput.
Allannguinissamut siunersuutit pingaarnerit, Inatsisartut siulittaasoqarfiata ullumi saqqummiussassai taamaapput.
Inatsisartut siulittaasuat, Josef Motzfeldt, oqarpoq, inatsisiliortut sulinerisa naammassisaqarfiunerunissaat uani siunertaasoq:
Inatsisartut qiilanerusumik anguniagaqarpalaarnerusumillu oqalliseriaaseqalernissaat, 2008-mi allanngortitsinermi siunertarineqarpoq. Tamanna ilaatigut eqqortinneqarpoq. Kisianni aappaatigut uteqattarisoqarsinnaanera takorloorneqarsimanngilaq, Josef Morzfeldt oqarpoq.
Malittarisassat nutaat napertorlugit partii ataaseq oqaaseqartartumut amerlanerpaanik pingasoriarluni apeqquteqarsinnaavoq. Ukiaq ataatsimiinnermi aperinissaq killilersorneqanngilaq. Aamma naggataarutaasumik oqaaseqarnermi apeqquteqartoqarsinnaajunnaarlunilu oqaaseqaateqartoqarsinnaajunnaarpoq.
Oqaaseqarnissamut killiliussat Atassutip gruppiata siulittaasuanit iluarisimaanerqarput:
- Isumaqarpunga inatsisartuni ilaasortat isummaminnik ersarinnerusumik anitsisalissasut, piffissamik atorluaanerulissagamik. Ataatsimiinneq aamma qasujaannerujussuarmik isumaga malillugu ingerlasussaavoq. Tassami ukiaq ataatsimiinnerput misillerfigereerparput, apeqqutit paasereerlugit akineqarsinnaanngitsut apeqqutigineqaqattaartuarmata, tamanna ileqqorissaarnertut oqaatigisinnaanngilara.
Ataatsimeeriaatsip nutaap kinguneranik, qinersisartut internetsimut attaveqannngitsut Nuullu avataani najugaqartut, oqallinnernut malinnaanissamut periarfissakinnerulerput.
Siunnersuutit akissutaasalu allanneri pissarsiarisinnaanngikkunikkit, oqallinneq ilaannakortumik malinnaaffigisassavaat. Tassami ataatsimiinnerup ilaannaa KNR-imit aallakaatinneqartarpoq, malittarisassallu nutaat atuutilerpata, siunnersuutit akissutaallu tamatigut atuarneqartarnavianngillat.
Josef Motzfeldt tamatumunnga ima oqarpoq:
- KNR oqaloqatigiuarparput, massakkut killiffigisarput tassaavoq atortutigut digitalinngorlugit atuilernissamut periarfissat ammaanneqarnissaat.Taamanikkussamut inatsisartuni oqallinnerit tamakkiisumik aallakaatinneqarsinnaanngussapput, Josef Motzfeldt oqarpoq.
Oqaaseqarnissamut piffissaliussat nutaat partiinut, ilaasortanut Naalakkersuisunullu tusarniaassutaareernikuupput.
Inatsisartut maajip 19-iat ilanngullugu upernaakkut ataatsimiissappput.
