Nalakkersuisunut illua-tungiliuttut Atassutip Demokraatit Kattusseqatigiillu naalakkersuisuusimasup Simon Olsenip tunuarnera kisiat naammaginagu naalakkersuisut tatiginagit suaarutigaat, siumulli IA-llu amerlanerussuteqarlutik tamanna pingitsoortippaat.
Naalakkersuisunik tatiginninnginnermik taasititsinerup kinguneraa IA-p Atassummik qinersinermut teknikkikkut suleqateqarnera taamaatillugu.
- Uppititsiniaanerit marluk takutereerpaat isummanik qanillattuinermik takutitsisoqarsimanngitsoq, killormulli uppititsiniaanermut takutitsinerusoq.
- Siumup Inuit ataqatigiillu inussiarnersumik Atassummut isaassinerat mannamut kinguneqanngilaq, aqagulu ataatsimiititaliani taaseqataasarnermi teknikki atorunnaassaaq, Aqqaluk Lynge oqarpoq.
Naalakkersuisooqatigiinni illuatungiliuttut Atassut, Demokraatit Kattusseqatigiillu ataatsimiititaliani assigiinngitsuni sumi inissisimalissanerlutik assortuussutigisariaqalissavaat.