Inatsisartuni isertortumik paasiniaasartut

Demokraatit nassuiaateqaqqullugit Siumut Inatsisartut Siulittaasoqarfiannut piumasaqarpoq. Siumup paaserusuppaa Demokraatit siulittaasuata tullia Palle Christiansen Siumup ataatsimiittarfiani ilumut mikrofonilersuisimanersoq. 

Namminersornerullutik Oqartussani tallimanngorneruvoq silalu taarluni atoruminarpallaanngilarlu.

Inatsisartuni ilaasortat angerlakaareersimapput, allaffiillu amerlanerit qaminngapput. Taamaallaat Palle Christiansenip allaffia suli ikumavoq, immaqaana utaqqisaqartoq?

- Tallimanngormat unnukkut qulingiluat qulillu akornanni illooqqama aappaatalu Naaminersornerullutik Oqartussat allaffissuannut aavaannga. Tassaniinnerat iluatsillugu allaffeqarfissuarmut takornariartippakka, Palle Christiansen oqaluttarpoq.

Takornariat inatsisartuni ilaasortat sutortarfianneeriarlutik partit allaffeqarfiannut anillapput, Siumullu ataatsimiittarfiata matua ammaannarmat alakkarterpaat.  

Taamaalinerani partiit gangiannut allamik isertoqarpoq. Otto Jeremiassen errortaminik aallerluni allaffimminukartilluni takuai Palle Christiansen inuillu allat marluk Siumup ataatsimiittarfiata silataani nikorfasut.

- Otto Jeremiassen gangimi naapipparput, aperimmallu sunersugut oqarfigaara: Mikrofoninik isertorluta ikkussuigatta!

Tassalu Palle Christiansenip taama oqarnera Inatsisartut Siulittaasoqarfiannut apuunneqarpoq. Palle Christiansenimmita pisimasoq qanoq ilikkagaqarfiaa?

- Ilikkarpara quiasaarneq oqarusernerlu inatsisartut allaffianni atornaveersaassallugit, ilaasami paasisinnaanngippatigit atortariqanngillat.

Palle Christiansenip nassuiaatini inatsisartut siulittaasoqarfiannut ippassaq tunniuppaa, siulittaasoqarfiullu pisimasoq aqagu naliliiffigissavaa.