Inatsisartuni illuatungiliuttut: Naalakkersuisut suliassaminnik allatut tulleriiaarisimasinnaagaluarput

Naalakkersuisut siulittaasuata Hans Enoksenip inatsisartut ukiakkut ataatsimiinissaannut tunngatillugu oqalugiaataa illuatungiliuttunit uparuartorneqarpoq, allatut tulleriiaarisoqarsimanissaa ilaatigut oqariartuutigineqarluni.
Allattoq Mads Lynge
septembarip 25-at 2007 16:58

Isumatusaarluni pilersaarusiortoqartassasoq suliallu tulleriaarluarlugit ingerlanneqartarnissaat pingaartikkitsik, Kattusseqatigiit Partiiata siulittaasua Anthon Frederiksen naalakkersuisut siulittaasuata inatsisartut ukiaanerani ataatsimiinnissaannut atatillugu ammaanersiornermi oqalugiaataanut taama oqariartuuteqarpoq:

- Innuttaasunut tunngasut salliutinneqartariaqarput. Aalisarnermut inatsit nutaaq pingaarnersanut ilaatinneqartariaqarpoq, piaartumillu naammassineqarnissaa sulissutigineqartariaqarpoq, Anthon Frederiksen oqarpoq, nangillunilu:

- Suliassanik tulleriiaarinermilu pingaarnersiuinermilu, suliassallu tamakku inuiaqatigiinnut sunniuteqaatigisinnaasaat sukumiisumik misissuiffigineqarsimannginnerat erserneriinnarpaat tamakku, Kattusseqatigiit Partiiata siulittaasua oqarpoq.

Inatsisartut ukiakkut ataatsimiinnerat inatsisartut isaannik isigalugu ukiortaarsiornerusoq Demokraatit siulittaasuata Per Berthelsenip oqaatigaa, kingumullu isigaluni naalakkersuisunik naliliinissartik ileqquliussimanerarlugu.

Taamatut naliliisoqarnera inuttarsiuinertut nalilerneqarsinnaasut naalakkersuisut siulittasuata Hans Enoksenip akissuteqarnermini oqaatigaa.

Atinik taaguinngikkaluarluni naliliisoqartoq Per Berthelsenip oqaatigaa.

Demokraatilli oqalugiaammut oqaaseqaataanni malunnarpoq naalakkersuisoqarfiit ataasiakkaarlugit taakkartorneqartut, soorlu piorsarsimassutsimut ilageeqarnermullu naalakkersuisoqarfik Tommy Marø-mit akisussaaffigineqartoq:

- Illit atia taavat, kisianni tassa uani pineqartoq sangutinniarneqarpoq. Soorluli pineqartup inuup taassuma arlaatigut imigassartorsimalluni pissusissamisuunngitsumik saaffiginnissimasoq biiliunneqarnissani siunertaralugu, Per Berthelsen oqarpoq, nangipporlu:

- Inuk kinaluunniit imigassartorniarpat Demokraatit oqaasissaqarfiginngilaat, inuk kinaluunniit politiinut saaffiginnissinnaavoq nammineq oqariartuutini oqariartuutiginiarlugit. Uparuagarput tassaavoq qinikkatut inissisimasup pisoq salloqittaatigalugu qimarratiginninniarnera. Naluara inuit allat tamanna akuerisinnaaneraat, uanga nassuerutigissavara Demokraatit inatsisartuni ilaasortaatitai tamanna akuerisinnaanngimmassuk, Demokraatit siulittaasuat Per Berthelsen oqarpoq.