Inatsisartuni ilaasortat taasisitsinerni unioqqutitsisarsimasutut pasineqarput

Inatsisartunut ilaasortat 31-t Inatsisartut siulittaasuannit Ruth Heilmannimit tallimanngormat sakkortuumik uparuarneqarput. Tassami ilaasortat ataasiakkaat partiimi ilaasortaqatitik, Inatsisartut ataatsimiittarfianni najuutinngitsut, taasisitsinermi taasisittarsimagaat tusatsiarneqarsimammat.
novembarip 10-at 2008 10:15

Tusatsiakkat tamakku tusaanngitsuusaarumanagit Inatsisartut siulittasuat Ruth Heilmann Inatsisartunut ilaasortanut tallimanngormat novembarip arfineq-aappaanni unnukkut allakkatigut erseqqissaassuteqarpoq, ilaatigut ima allalluni:

'Inatsisartunut ilaasortanut erseqqissassavara, ilaasortat allat sinnerlugit inatsisartunut ilaasortat taasinissaat akuersaarneqarsinnaanngilluinnarmat.

Inatsisartut ilaasortaat kinaluunniit ataasiaannarluni taasisinnaavoq, taamatullu taasineq inatsisartunut ilaasortap kisimi isumagisassaraa. Qarasaasiakkut taasisitseriaammik atulersitsineq tamatuminnga allanngortitsisuunngilaq.

Ilaasortaq alla sinnerlugu taasineq kikkulluunniit oqartussaaqataanerannut tunngaviusumik ilungersunartorujussuarmik unioqqutitsineruvoq'. Qarasaasiakkut taasisitseriaatsimik unioqqutitsoqarsimappat tamanna kinguneqassasoq, Ruth Heilmannip erseqqissaassutigaa.

'Paasineqarpat qarasaasiakkut taasisitseriaaseq Inatsisartut ilaasortaasa atornerlukkaat tamanna Inatsisartut Siulittaasoqarfiannut saqqummiunneqassaaq, naatsorsuutigineqassaarlu unioqqutitsineq sakkortuumik iliuuseqarfigineqassasoq', Ruth Heilmann naggasiilluni allappoq.

Inatsisartut Siulittaasoqarfiat aqagu ulloqeqqanut tamanna pillugu ataatsimiittussaammata, Inatsisartut siulittaasuat Ruth Heilmann oqaaseqarumanngikkallarpoq.

Qarasaasiakkut taasisitseriaaseq nutaaq Inatsisartuni ukiaq manna atuutilersinneqarpoq.