Inatsisartuni ilaasortat marluk: Ataatsimiittarnerit sivitsorneqartariaqarput

Inatsisartut ataatsimiittarnerat sivitsorneqartariaqarpoq, suleriaatsillu nutarteriffigineqarlutik. Taamaaliortoqanngippat inatsisit tuaviuussaavallaartutut nalilerneqartalersinnaapput, ilaatigullumi taamaaliortoqarsinnaanngulereerluni. Inatsisartut Inatsisit Atortinneqarnerannut Ataatsimiititaliaanni ilaasortat marluk, tassa Lene Knüppel, Demokraatineersoq, kiisalu Asii Chemnitz Narup, Inuit Ataqatigiinneersoq taama isumaqarput.

Pissutsit atuuttut Ombudsmandiannit Vera Leth-imit uparuarneqarsimapput, tamannalu tunualiaqutaralugu Inatsisit Atortinneqarnerannut Ataatsimiititaliami oqaluuserisassanngortinneqarluni.

Lene Knüppel isumaqarpoq Inatsisartut sivikippallaamik ataatsimiittartut:

- Inatsisartut ukiaq manna ataatsimiinnerat tuaviinnavik ingerlanneqarpoq. Atorfillit sulerulutsinneqarput, nutserisullu ulapisitaallutik. Taamaaginnassappat Inatsisartuni sulineq ataatsimut isigalugu naammaginanngitsumik inerneqarsinnaassaaq. Taamaammat nutarterisoqartariaqarpoq. Meeqqanik inuusuttunillu ikiorsiisarneq pillugu inatsisissatut siunnersuut assersuutigiinnarsinnaavara, Lene Knüppel oqarpoq.

Pisariaqalerfiatigut nukinnik atuisinnaaneq pillugu malittarisassanik aalajangersaanissaq pillugu peqqussummik allanngortitsiniarluni siunnersuut saqqummiunneqaraluarpoq.

Asii Chemnitz Narup oqarpoq inatsisissatut siunnersuutit amerliartuinnavillutillu ullormut oqaluuserisassat amerliartuinnavissut. Sulerulunnarartarnerarpaa, ataatsimiittarnerillu sivitsorneqarsinnaanissaat ujartorlugu:

- Folketingimi ataatsimiittarnerit assigalugit ataatsimiissinnaasariaqaraluarpugut, ataatsimiittarnerit tassani kipisuikkaarnerullutillu sivisunerusarmata. Partiit allattoqarfii nukittorsarneqartariaqarput, ataatsimulli isigalugu Inatsisartuni suleriaaseq nutarterneqartariaqarpoq, Asii Chemnitz Narup oqarpoq.

Inatsisartut ukioq 2000-imi ukiakkut ataatsimiimmata oqaluuserisassat taamanikkut 74-iupput, ukiormannalu 147-llutik.