'Inatsisartuni ilaasortat isumasiorneqanngillat'
Inatsisartuni ilaasortat isumasiorneqanngillat, aamma Naalakkersuisut aalajangernerannut ilisimatinneqaratik, Finn Karlsen allappoq.
Issittumi sakkutooqarfik Nuummut inissinneqarpat, Nuummi innuttaasunut kingunerisassai Finn Karlsenip erseqqissarpai, tassalu inissaqarniarneq, napparsimaveqarneq, meeqqeriveqarneq, umiarsuliveqarneq aamma timmisartukkut angallanneq.
Narsarsuaq sakkutooqarfittut atorneqartussanngorlugu pilersinneqarpoq, siunertarisimasaanullu atorneqalernissaa tulluartuusoq Finn Karlsen isumaqarpoq.
Aningaasanut inatsisissatut Naalakkersuisut siunnersuutaat Finn Karlsenip innersuussutigaa. Narsarsuarmi mittarfiup aserfallatsaalineqarnissaanut aningaasanut inatsissami immikkoortitsisoqarsimanera innersuussutigaa, siunisssamilu Narsarsuarmi mittarfiup atorneqarnissaa Naalakkersuisunit kissaatigineqannginnera oqaatigalugu.
Assartuineq pillugu ataatsimiititaliarsuup innersuussutaa, tassalu timmisartunut mittarfimmik Qaqortumi sananeqarnissaanik innersuussutip malinneqannginnera Finn Karlsenip allakkamini aamma erseqqissaatigaa.