Inatsisartuni ilaasortat inatsisaatsuliorsimanerannut tunngasoq suli iliuuseqarfigneqanngilaq
- Siulittaasoqarfimmi suliassaqarpallaarnera pissutigalugu taasisarnermut tunngasut suli suliarineqanngillat. Suliassaq aqagu ataatsimiissutigissavarput, Ruth Heilmann oqarpoq.
Inatsisartuni taasinerni inatsisaatsuliortoqartarsimasinnaanera innuttaasut akornanni kamaatigineqaqaaq aamma partit naalakkersuisuutitaqartut siulittaasui marluusut, tassa Siumup siulittaasuata Hans Enoksenip aamma Atassutip siulittaasuata Finn Karlsenip suliassap sukumiisumik misissuiffigineqarnissaa piumasarereerpaat. Partit siulittaasuisa taakku marluk taasinerni inatsisaatsuliorsimasut saqqummerlutik akisussaaffimminnik takutitsinissaat piumasarereerpaat.
Taamaattorli Inatsisartut taasinerini inatsisaatsuliorsimanerup paasiniarnissaa ajornaatsuinnaagunanngilaq.
Augusta Salling, Inatsisartut siulittaasoqarfianni ilaasortaasoq oqarpoq, Inatsisartut ataatsimiittarfianni filmiliuutit nutaat, ataatsimiinnernik immiussisartut inatsisaatsuliortoqarsimaneranik uppernarsaatitut atorneqarsinnaanngitsut, ataatsimiittarfimmi issiasut saarliit kisimik assilineqarsinnaammata, tunuatungaanilu issiasut assilineqarsinnaanatik.
