Inatsisartuni ilaasortat ikilisinnissaat kingusinnerusukkut immaqa
Partiit annerit siulittaasui aperaavut ikilisitsisoqassanersoq. Siulliulluni Atassutip siulittaasua Finn Karlsen ima oqarpoq.
- Inatsisartut suliaqarpianngitsutut oqaatigineqartarneri ilumuunngilaq, sulialerujussuupput aamma ataatsimiinnerit avataanni. Ikilisariaqassappata aatsaat namminersulereerutta suliassat tigooragassat tigoorareerutsigit pisariaqassanersoq nalilersorumaarparput, Finn Karlsen oqarpoq.
Demokraatit siulittaasuat Jens B. Frederiksen oqarpoq namminneq inatsisartuni ilaasortat ikilisinnissaat qineqqusaarutigereeramikku suli ikilisartariaqarsorigaat.
- Isumaqarpugut 31-usariaqanngitsut. Ingammik aaqqissuussineq nutaaq kommunerujussuanngortitsineq, eqqarsaatigalugu oqartussaaffinnik kommuninut nussortitsiffiussammat, inatsisartut taamatorsuaq amerlatiginissaat pisariaqanngitsoq, Jens B. Frederiksen oqarpoq.
Inuit Ataqatigiit siulittaasuat Kuupik Kleist oqarpoq, isuma eqqartorneqarsinnaalluartoq.
- ”Iisakkassaap” oqarnermini inatsisartut sukkanerusumik sukumiinerusumillu sulisarnissaat kissaatigaa. Tamanna isumaqatigaara, kisianni ikilisinnerisigut taanna anguneqarsinnaanersoq uanga nalornilaarpara, Kuupik Kleist oqarpoq.
Inuit Ataqatigiit siulittaasua Kuupik Kleist, aamma isumaqarpoq inatsisartuni ilaasortat amerlassusaat kingusinnerusukkut nalilersorneqarsinnaasut, massakkuunngitsoq. Siuliani tusarparsi Demokraatit siulittaasuat Jens B. Frederiksen, siulliullugulu tusarlusiuk Atassutip siulittaasua Finn Karlsen. Siumut partiiata Naalakkersuisullu siulittaasuata Hans Enoksenip oqaasii Qanoruumi unnugu tusarsinnaajumaarpasi.