Inatsisartuni ilaasortaq: Tamat oqartussaanerat kanngunartuliorfigineqarpoq
- Inatsisartut sulisitaat uppernannginnamik? Imaluunniit naalakkersuisut sulisitaat uppernarnerugamik?Isumaqarpunga inatsisartut sulisitsisuummata, taanna malittariaqaripput.
Inatsisartut Inatsisit Atortinneqarnerannut Ataatsimiititaliaata siulittaasua Kristian Jerimiassen Atassut tunuliaqutaralugu inatsisartuni ilaasortaavoq, soorlu Inatsisartut akileraartarnermut ataatsimiititaliata siulittaasuattut aamma inissisimalluni.
Ippassaq inatsisartut kukkunersiuinermut ataatsimiititaliaata siulittaasua Godmand Rasmussen oqarpoq kammeradvokatip Nuna Eqqartuussissuserisut Namminersornerullutik Oqartussat inissiaataannik attartortumiit piginnittumut aaqqissuussinermut tunngatillugu misissortitaata naggasiinerussasoq.Kristian Jerimiassen aperaarput qanoq tassunga isumaqarnersoq.
- Isumaqarpunga uani suliami kusananngitsumik kinguarsaaniartoqartoq, isumaqarpunga uani inatsisartut kukkunersiuinermut ataatsimiititaliap suliarisimasaani, taanna kukkunersiuisut upperineqartariaqartut, qaqugumi suliaq naammassineqassava kinguarsartuarlugu, aamma naalakkersuisut allamik naliliisitsisussanngorpata. Uku, kukkunersiuisut assigiinngitsunik isumaqartarput, qaqugu taava killissuugut misissuisitsiuaraluarutta. Peqqusiileqinaqaaq, suliap taamatut ingerlanneqarnera. Inatsisartut kukkunersiuisartuisa sulisitaa upperisariaqarparput.
Kristian Jerimiassen inatsisartut ataatsimiititaliaanni pingasuni siulittaasoq oqarpoq. Inatsisartut ataatsimiititaliaat naalakkersuisunit taamatut akineqartarneri, tamat oqartussaaqataanerannut qanoq kinguneqarsorineraa apeqqutigigatsinni.
Isumaqarpunga naalakkersuisut uani pisumi oqaaqqissaartariaqarlugit, inatsisartut taakkua sulisitsisuupput aamma taakkua suliakkiisuunikuupput, taamaattumik taanna suliaq taamatut ingerlasariaqartoq, isumaqarpunga naalakkersuisut taamatut kinguarsaaniarnerat kikkut tamat oqartussaanerannut kanngunartuusoq.
Kristian Jerimiassen Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaanut aamma siulittaasuuvoq.
