Inatsisartuni ilaasortaaneq ilaqutariinnermut sunniuteqartarpoq
Inatsisartunut ilaasortat Nuummi ulluni makkunani katersuutileruttorput, inatsisartut upernaakkut ataatsimiinnerannut tallimanngorpat aallartittussamut peqataajartorlutik. Inatsisartuni ilaasortat pingajorarterutaat Nuup avataani najugaqartut, qaammatini peqanngiffimminni ilaqutariittut inuuneq nalinginnaasoq qimakkallartarpaat. Ilaquttat qimannerat qanormitaava misinnartarpa?
-Ajornanngippat najortuaannarusunnartaraluaqaat maani, aamma una eqqarsaatigineqartariaqarpoq, ilaatigut pingaartumik ukiakkut qaammatit pingasut marloriarlunga mulunikuuvunga. Pikkunaaluttartorujussuuvoq taama sivisutigisumik qimassimaneq unalu aamma niaqorlorujussuarsinnarluni angerlarluni - pingaartumik hotelip avataani ineqarluni – qasoreerluni aamma pinngitsoorneqarsinnaasanngilaq nerisassiorneq, ilaannikkut takornartaanngilaq akuttugaluartumik unnussuakkut aatsaat asoortarnerput aamma.
Inatsisartuni ilaasortat sinerissaminngaanneersut Nuummukartinnatik ilaquttatik ulluni makkunani inuulluaqqujortorpaat. Amerlanerit Nuummut tikinnerminni hotelini imaluunniit inini attartortakkani qaammatini marlunni najugaqassapput. Inatsisartuni ilaasortaanermut inatsit malillugu Godmand Rasmussenip nuliani meeqqanilu 18-it inorlugit ukiullit Namminersornerullutik Oqartussat akiligaannik ukiumut ataasiarluni tikeraartorisinnaavai.
-Uanga ukiakkut atornerusarpara taanna, ukiakkut sivisunerusarami, massakkut qujanartumik poorskimi angerlarallarsinnarluta aatsaat maannaqqikkutta maajip 2-ani naammassissaagut, tassa 9-ani aqaguagu aallartikkutta, taava 30-ani naggaraarallarsinnarluta 11-ani aallarteqqissaagut apriilip.
Assersuutigalugu ilaquttat ukiakkut tikeraartorisimagaanni - upernaakkut ataatsimiinnerup nalaani inatsisartuni ilaasortaq angerlalaassaguni tikeraarneqassaguniluunniit, nammineq aningaasivini atortariaqarpaa. Inatsisartut ataatsimiinnerminni ullormusiaqartinneqartarput, taamaattumik ilaqutakkaanut qaammatit ataatsimiiffiusut artornartarnerarpai.
-Meerartaqarluni arlalinnik pingaartumik isorartuuningaanniit aggersuulluni, soorlu nalunngilara Tasiilami ilaasortaasup malugingaatsiartartorujussuugaa. Aamma ernuttaminnik mikisunik ilai najorteqartaramik mikisunik qaffasilaartarunaqaaq taamatut aggersitsisarneq aamma, inummut nammineq, Atassut sinnerlugu inatsisartuni ilaasortaq oqarpoq.
Godmand Rasmussen aamma oqarpoq, meeqqat nukangasut sivisuumik qimassimatillugit angerlarluni ulluinnaqaqqilernissaq artornarsinnaasartoq aamma ilaquttat tikeraassatillugit aapparisap suliffimminit feeriassaqarnera apeqqutaasartoq. Taamaattumik polikeriunissaq toqqarsimagaanni ilaqutariittut inuunermut sunniutai nalilersortuartariaqarnerarpai.
