Inatsisartuni ataasinngornermi pisussat

Inatsisartunut ilaasortat ukiukkut ataatsimiinnerminni sapaatip akunnera sulinngiffeqareerlutik, Naalakkersuisunilu ilaasortat arfineq marluk, ilai Kinami allallu Finlandimi angalareerlutik, ataasinngornermi inatsisartuni ataatsimiinerminni oqaluuserisassaat immikkoortut 13-iupput.
Allattoq Karsten Sommer
novembarip 06-at 2017 07:16
Nutserisoq Jaaku Lyberth

Oqaluuserissaani immikkoortoq ataaseq pingajussaaneerneqassaaq, tassalu Kalaallit Nunaannut suliffissarsiortut killilersimaarnissaat pillugu Inatsisartut inatsisaata allanngortinneqarnissaanik siunnersuut.

Oqaluuserineqartussani immikkoortut qulit aappassaaneerneqassapput. Imigassanik aalakoornartortalinnik tuniniaanerit aamma imigassartortitsinerit tamarmik kiisalu angerlarsimaffinni imigassanik aalakoornartortalinnik  imigassaliortarnermut tunngasoq.  

Qaffasinnerpaamik siusinaartumik  pensionisianik pisartagaqartunut tunngaviusumik pensionisiaqartarnerup
atulersinneqarnissaanut siunnersuut oqaluuserineqassaaq.

Angajoqqaat meerartaareernermi kingorna sulinngiffeqarsinnaatitaanerisa sapaatit akunnerinik sisamanik sivitsorneqarnissaannik siunnersuut oqaluuserineqassaaq.

Inatsisartut ataatsimiinnerat naggaserlugu oqallisissiat allaavigalugit siunnersuutit marluk oqaluuserineqasapput taassalu suliffeqarfiit nutaat aallarnisaasut akileraartarnikkut qanoq oqinnerusumik qanorlu pisortaniit ikorfartorneqarsinnaanerat pillugu apeqquteqaat aallaavigalugu oqallinneq.

Inatsisartut ataasinngornermi ataatsimiinerat naggaserlugu apeqquteqaat aallaavigalugu oqallinnissamik siunnersuut, tassalu qanormi iliorluta  nakorsassassaaleqineq aaqqiivigineqarsinnaanersoq aamma nakorsat  avataaniit tikittut nunaqavissunngorusuttut eqqarsaatigalugit qanoq ililluta aaqqissuussiniarnersugut kiisalu piffissanngunnginnersoq nunarsuaq tamakkerlugu nakorsassarsiortalernissamik Jens Erik Kirkegaardip oqallinnissamik siunnersuutaa kingulliullugu oqaluuserineqassaaq.