Inatsisartuni arnat ilaasortanngortut arlaqarput. Inatsisartuni inissat 31-t akornanni 13-it arnanit inuttalerneqarput, Inatsisartunut kingullermik qinersinermi 2002-mi pisumi marlunnik amerlanerusunik. Arnat procentinngorlugu 35 %-imit 41 %-imut siuariarput.
Naligiissitaanermut Ataatsimiititaliami siulittaasoq Agathe Fontain Inuit Ataqatigiit sinnerlugit Inatsisartunut qinigaaqqittoq isumaqarpoq, arnat amerleriarnerat pitsaasuusoq, sulili amerlanerusut isersimanissaat kissaatigisimagaluarlugu.
- Arnat suli amerlanerusut qinigassanngortittarnissaat malunnarnerusumillu saqqummertarnissaat kissaatiginarpoq, taamaalillutik inuiaqatigiinnit ilisarisimaneqarnerulerniassammata. Agathe Fointain nassuiaavoq.
Arnat qineqqusaarnerup avataatigut aamma saqqummertarnissaannik kaammattuivoq, soorlu aviisini allaaserisaqartarnikkut peqatigiiffinnilu ilaasortaanikkut pisinnaasoq.