Inatsisartuni 16-iinnaat isersimasinnaassapput
Ullaakkorsioqatigiittoqassanngilaq. Politikerit inersuarmi ikinnerussapput.
Inatsisartut ukiaanerani ataatsimiinnissaminnut katerilerpata pisarnermisut pinnatsik allatut ammaanersiussapput.
Nunatta sinnerani illoqarfinni coronartut ikiliartoraluartut Nuummi coronartut amerliartuinnavipput.
Nuummi ullup ataatsip ingerlanerani tunillatsissimasut nutaat 13-it paasineqarput. Nunarput tamakkerlugu coronavirusimik tunillanneqarsimasut 143-pput.
Ullunili kingullerni tuniluunneq sukkasuumik aqunneqarsinnaanngitsumillu ingerlammat Inatsisartut killilersuiniarlutik aalajangerput.
KNR-ip aallakaatitassiaani Nunatta Nipaani Inatsisartut siulittaasuat, Hans Enoksen, apersorneqarluni ima oqarpoq:
- Covid-19 pissutigalugu sukannernerusumik ingerlatsinissarput tassa aaqqissuupparput. Pingaartumik ulluni tulliuttuni coronap annertuumik takkukkiartuaarusaarnera taanna eqqarsaatigalugu, Hans Enoksen oqarpoq
- Allanut naleqqussaanissamik piumasaqaratta uagut aamma inatsisartuni tassani naleqqussaaniarpugut, siulittaasoq oqarpoq.
Ilaasortat affai sinnilaaginnarlugit inersuarmiissinnaapput
Inatsisartunut aappagu siunnersuutissat aningaasaqarnermut tunngasut soorlu neqit kaffillu akitsuusersorneqarnissaat inatsisartunit ilaasortanit 31-usunit taasissutigineqalerpata ilaasortat 16-iinnaat inersuarmi isersimasinnaassapput.
Taamatullu ilaasortat issiavii assiaqutsersorsimassapput. Ilaasortallu sinneruttut 15-it inersuarmiissinnaanngitsut allaffimmiit qarasaasiakkut video-link atorlugu malinnaassapput.
Inatsisartunut ilaasortat amerlasuut sinerissami najugaqartut, ukiaanerani ataatsimiinnermut peqataajartorlutik piffissami matumani Nuummut tikeraraluarput.
Inatsisartut ataatsimiinnertik ammaanersiorlugu Hans Egedep illuarni ullaakkorsioqatigiittarput, kingornalu Annaassisitta Oqaluffiani naalagiaqatigiittarput, Inatsisartoqarfimmullu pisoqatigiittarlutik.
Ukiorli manna taamaaliornavianngillat, aamma ullaakkorsioqatigiissanngitsut, Enoksen oqarpoq.
Nuummi tuniluunneq taama annertutigitillugu katersuussinnaaneq killeqarmat taamatut aalajangertoqarpoq.
Neriniartarfinnut imerniartarfinnut assigisaannulluunniit iserniaraanni maanna tamakkiisumik akiuussusersimanermut uppernarsaammik takutitseqqaarnissaq piumasaqaataavoq, taamatullu tunillatsissimannginnermut uppernarsaammik takutsitseqqaartussaalluni.
Taamaammallu pisut aallaavigalugit killilersuutit sukaterneqassanersut eqqumaffigineqassasoq, peqqinnissamut naalakkersuisoq, Kirsten L. Fencker ippassaq tusagassiortunik katersortitsinermi oqarpoq.
- Ullulli tamaasa nalilersuiuarpugut, peqqissutsikkullu illersorsinnaasumik maannakkut inissisimagallarpugut, naalakkersuisoq oqarpoq.
