Inatsisartoqarfimmi pissannganneq

Immikkut ittumi ataatsimiinnermi siulittaasumik siulittaasoqarfimmilu ilaasortassanik toqqaanissaq kisimi oqaluuserisassaavoq.

Qinigassanngortinniartut marluupput tassa Siumumeersoq Ruth Heilmann aammalu IA-nneersoq Josef Motzfeldt. Suleqaterput Karline Platou toqqaannartumik ilanngutassiivoq:

- Maanna Inatsiartut ataatsimiittarfiani isersimavugut Inatsisartut siulittaasussaannik taasineq nalunaaqutaq pingasunut aallartissaaq. Ataatsimiittarfik inoqanngilaq isersimaqatikka eqqaassanngikkaanni, assullu nipaalluinnarluni, Karline Platou toqqaannartumik oqaluttuarpoq.

Taassuma Mikael Petersen aperaa illup iluani pissangasoqarnera qanoq misigineraa.

- Inatsisartut siulittaasussaanik Inatsisartut qinersileraangamik pissanganartuaannartarpoq. Malunnarpoq pissangasoqartoq aamma maani Namminersornerullutik Oqartussat illorsuata iluani, Mikael Petersen oqarpoq.

Ilutigitiinnarlugu Kuupik Kleist aperaarput Josef Motzfeldt piukkunneqarluartoq taaneqanngitsooriataassagaluarpat IA-miit qanoq igineqassanersoq.

- Isumaqarpunga inuiaqatigiinni killiffipput ullumi eqqarsaatigalugu Josef Motzfeldt siulittaasussatut taaneqanngitsoorpat taava nikeriarnissamut periarfissatsialassuaq sapanginneqassaaq. Aammalu Inatsisartut sulineranni toqqissisimasumik siunnerfeqarneq pinngitsuussaaq, Kuupik Kleist tunngavilersuivoq.

Nangillugu aperaarput illuatungaatigut isigalugu Josef Motzfeldt iseriataassagaluarpat tamanna qanoq akissaneraa.

- Taava Inatsisartut sullinneqarnerisa ingerlanneqarnerat patajaatsumik nutarteriffiusumillu ingerlanneqassasoq qulakkiissavarput, aamma pisariaqartinneqaqaaq Inatsisartut sulinermikkut nutarternissaat aammalu eqaannerusumik suleriaaseqarnissaat inuiaqatigiinnullu toqqaannarnerusumik oqaloqatiginninnissaat siulittaasunngortitsissagutta siunnerfigaavut, Kuupik Kleist oqarpoq.

Taanna isumaqarpoq Siumut Inatsisartut siulittaasoqarfianni ingerlaannassagaluarpat tamanna pissutsinik taamaaginnartitsissasoq.

- Ajuusaaarnaraluartumik ukiuni kingullerni tusiapittorujussuarmik Inatsisartut ingerlasimanerat nangittussanngussooq, Kuupik Kleist oqarpoq.

Mikael Petersen aperaarput Atassutikkut kimik piukkussinerminnik oqaaseqarumanngimmata kina iserumaarnersoq eqqoriarsinnaaneraa.

- Neriuutiginarpoq Siumumiit siunnersuutigineqartoq Ruth Heilmann isissasoq, Mikael Petersen akivoq.